3569/2023-2024

LUNGLEI;the 30th January, 2024: Vawiin 12:00 Noon khan Pi Lalrinpuii, Minister for Health & Family welfare, Social Welfare & Tribal Affairs, etc. chuan MJA Lunglei Annual Conference khuallian niin a hman pui. Programme hi Pu Thanghmingliana Renthlei, Vice president, MJA Lunglei chuan kaihruaiin, Pro Pastor Laldinmawia Hnamte in hunserh a hman zawhah Pu Laltlanthanga, President MJA Lunglei in Presidential Speech sawina hun a hmang.

Khuallian Pi Lalrinpuii chuan thu sawina hun hmangin, Democracy ramah hian mipui ten a hun takah, thudik tak an hriat thin a tul a, chutianga mipui ten information dik an dawn theihna tura mi pawimawh berte chu kan chanchinbu mite hi in ni a. Langtlang Sawrkar (transparent Government) kan neih theih nan te, Sawrkar hotuten an thutlukna siamah mawhphurhna tluan tling an lak (Accountable) theih nan te, a tul ang zela Sawrkar khalh ngil tur leh kawng tha leh dik lama mipui rilru sukthlek kaihruai tur hian kan chanchinbu mite hian theihna inngahin, in pawimawh em em bawk a ni.

Chuvangin Sawrkar chuan chanchinbu mite hi a ngaipawimawh em em che u a ni. Tunah hian Ruihhlo avangin kan ram leh hnam hi a damlo mek a, kan Chief Minister zahawm tak Pu Lalduhoma “100 Days Programme”-ah pawh “Ruihhlo Dona” kawnga hmalak nghal a tul zia tarlan a ni a. Kan CM zahawm tak “100 Days Programme” hi tih hlawhtlin anih theih nan keini pawh-in ka Department chan pakhat “Social Welfare & Tribal Affairs Department” hnuaiah hma la nghalin, nimin mai pawh khan Mizoram chhunga Kohhran Hmeichhe pawl hrang hrang leh NGO hrang hrangte sawmin, Ruihhlo Dona kawnga hmalak dan tur “Consultative Meeting” hlawkthlak tak mai kan nei a. Kan ramah ruihhlo in bu a khuar ngheh tawh em avang hian min dopui turin kan chanchinbu mite hi ka sawm che u a, chu mai bakah mipui ten nasa zawka tan kan lak tlan theihna tura, mipui hnena nasa zawka awareness min siam pui turin ka sawm nghal bawk che u a ni.

Health Department lam ka lo chan ve takah chuan ka han zirchiang ve zel a, hriattur leh zir tur a lo tam hle mai a. Health Care bik hi han thlur bing lawk ila, Health Care hi level 3 angin a sawi theih a, chungte chu – Primary Health Care - Doctor/Nurse etc a inentirna. Secondary Health Care - Specialist hnena in entir leh na. Tertiary Health Care - Specialist leh tunlai Khawl changkang nena in enkawlna. Mizoram bikah hian Primary Health Care lama Service Centre – CHC, PHC, Health & Wellness Centre leh Sub Centre din kawnga hmalakna hi a lo nasa em em mai a lo ni a. Mithiamte chhut danin Mipui 20000 chin awmna ah PHC pakhat, Mi 5000 awmna chinah Sub Centre pakhat awm a tawk laiin, khawtin, vengtin deuh thaw-ah Service Centre hrang hrang dah a lo ni fur mai si. Hei hian thawktu lamah indaihlohna nasa tak min thlen mek a. Service Centre tina thawktu dah vek tur phei chuan State pakhat budget in tlin chi niin a lang lo hial a ni. Tin, tunah hian Aizawl Civil Hospital, Lunglei Civil Hospital, ZMC, Siaha leh Champhai-ah te ICU khum leh bungrua chu kan nei hlawm a, mahse thawktu lam indaihlohna avangin a function tur angin a la hman theih loh reng mai. Heng te avang hian media lama kan hmuh thin, ZMC leh District Hospital ah ICU khum chuti zat dah belh a ni tih te pawh, thawktu neih loh vangin a lo hman theih miah loh a nih chu. Chutih laiin Mizoram mipui ten sum kan sen tamna ber leh Sawrkar leh mimal/chhungkua anga sum luanral tamna ber chu heng Secondary Health Care leh Tertiary Health Care kan tih Lung zai, Kal thlak, Cancer enkawlna etc te a ni bawk si. Kan Mizo Doctor thiam tak tak ten Mizoram damdawiin ngeia Kal (Kidney) thlak ve an inhuam thu han hriat te, Cancer zai thei tura khawl leh hmanrua an neih that ve tawh zia han hmuh te leh Cancer zai tur Surgean tha kan neih ve tawh dan te, Lung zai lama hmalak theih an chak ve tawh thu te leh heng hmalakna hian Sawrkar leh mimal sum tam tak a save theih dantur han chhut hian, Tertiary Health Care lama hmalak nasat hi a chakawm zual hle a ni.

Specialist Doctor leh Super-specialist thiam tak tak kan neihte pawh hi an thiamna kan hman tangkai theihdan ber tur chu tun lai khawl changkang awmna (Facility awmna) a dah a ni a. eg: Zaimi (Surgean) ni reng si, mi zai theih miah lohna hmuha dah te, khawl awm miah lohna hmuna dahte hi “Wastage of man power” dik tak a ni dawn a ni. Entirna dang leh-ah chuan Lung lam doctor - Cardiologist thiam tak kan nei thar dawn, a lo chhuah veleha Lunglei a dah ka chak hle.Mahse cardialogist te chuan lung enna khawl “cath lab” tello chuan medicine specialist te tih theih ang bak tih theih a nei vak chuang lo reng reng a ni. Chuvangin, theihtawp in hma kan han la chho anga, Health Department lamah pawh tun aia nasa zawka hmasawnna kan neih theih ngei ka beisei a ni. Mizoram hi tlangram a ni a, a mawina pangngai “natural beauty” hlut tu kan thahnem chho zel rualin tourist tam zawk hip tur leh tourism atanga sum lalut belh tur chuan hmalak nasat kan la ngai em em a, Tun tum ka lo haw pawh hian Lunglei leh a chhehvel khua ten Tourism lama hma kan sawn theihna tur Plan tha tak mai kan neih theih nan Tourism lama kan hotu – Addl Secretary Pu V. Lalengmawia chu min tawiawm turin ka ngen a. Ani hian Theiriat tlang te, Serkawn, Sairep etc te a hmunah a rawn fang anga, Plan te pawh a tul angin kan siam tlang thei dawn a ni.

Eng anga Plan tha pawh mipui thlawpna tello chuan a hlawhtling thei dawn lo a, chuvangin vawiin ni a chanchinbumi lokal khawmte pawh mipuite hnena a tul anga  Awareness min pek pui a, min tanpui zel turin ka sawm duh bawk che u a ni. Chanchinbu mite nena thawhhona tha tak neih zel hi ka duh a, kan ram leh hnam hmasawnna tur kawngah chuan te lua awm lova min fin chhuah zel turin ka ngen duh che u, tiin MJA Lunglei District chu Pathian zara tluang taka kal zel turin duhsakna a hlan nghal bawk a ni.