1737/2024-2025

Dated Aizawl, the 26th August, 2024: Vawiin chawhma dar 10:00 khan DP&AR Minister Pu K. Sapdanga chuan '10th Foundation Training for Junior Grade of MSS Officers' chu Administrative Training Institute, MINECO ah a hawng a. Pi Betsy Zothanpari Sailo, Secretary to the Govt of Mizoram, Mizoram Secretariat Service Association (MSSA) President ni lai chuan a hmanpui bawk.

Pu K. Sapdanga chuan MSS Officer Training-te chu Mizoram Sawrkar-ah post pawimawh tak tak chelhtu an nih angin an hna theuhte rinawm leh taima taka thawk turin a fuih a. Training chu hna thawk tak tak duhte tana khamawm lo tak leh thil pawimawh berte zinga mi a nih thu sawiin, "Ram rawng bawl tum tak tak tan chuan training hi loh theih loh thil a ni" a ti. Training turte chu an tihsual atanga inzir thin tura chahin, mipui rawng chu nuam ti taka bawl turin a fuih a. Sawrkar tana rinawm leh nghet taka ding tlat turin a chah nghal bawk. 

Pi Betsy Zothanpari Sailo, Secretary to the Government of Mizoram, I&PR/Vigilance leh MSSA a President ni bawk chuan MSS Officer-te chu dinhmun pawimawh tak chelhtu an nih thu leh an thawh that leh that lohin Sawrkar Department hmel a tihdanglam theih thu sawiin, thahnemngai taka thawk turin a chah a ni.

He programme hi Pu Lalhmansanga, Joint Director (Admn), ATI in a kaihruaia, Pu Lalremruata Ralte, Joint Director (Trg) in lawmthu sawiin hun hman a khar a ni. Tun tum Jr. Grade of MSS Officers Training-ah hian mi 30 an tel a ni.