1738/2024-2025

Aizawl, the 26th of August, 2024: Vawiin khan Pu Lalnghinglova Hmar, Minister of State, Labour Employment, Skill Development and Entrepreneurship (LESDE), Sports & Youth Services (SYS) leh Excise & Narcotics Department chuan Meghalaya Deputy Chief Minister, Home Department changtu ni bawk Pu Prestone Tynsong chu Shillong-a a chenna in ah a kawm a, kawng hrang hranga Mizoram leh Meghalaya thawhdun theihnate an sawidun. 

Mizoram Excise & Narcotics Minister Pu Lalnghinglova Hmar leh Meghalaya Home Minister-te chuan ruihhlo do kawngah State pahnihte tha taka thawhho a tul thu an sawi a. A bik takin Myanmar atanga ruihhlo tawlhruk, Mizoram a paltlang hnua Meghalaya-a man awm thin chungchangah, inhriatthiamlohna leh harsatna awm lovin State pahnih hotute tlang taka inbiak thin nise an ti a ni. 

Meeting-ah hian Pu Lalnghinglova Hmar chuan Shillong-a Mizo awmte’n harsatna an tawh thinte thlenin, Meghalaya Deputy CM chuan a lo ngai thutak hle a. An harsatna chinfelsak tur leh, harsatna an tawh zui loh nana hma la turin meeting karah phone-in Meghalaya Sawrkar official-te a hriattir nghal a ni. Shillong-a Mizo awmte’n harsatna an neih chuan direct-in emaw, Mizoram Sawrkar kaltlangin emaw, a hnena thlen thin turin Meghalaya Deputy CM chuan a sawm nghal bawk. 

Meeting-ah hian Mizoram leh Meghalaya-te chu tunhma atanga thian tha an nih thu tarlan a ni a. Meghalaya Deputy Chief Minister chuan Mizoram Sawrkar, Chief Minister leh Home Minister-te duhsakna a hlan thu leh, State pahnihte inthianthatna chu chhawmnun zel a duh thu Mizoram Sports Minister kaltlangin a chah nghal a ni. 

Vawiina meeting-ah hian Pu Hamletson Dohling, Adviser to CM, Meghalaya pawh a tel a. Pu Lalchhanhima, DRC, Mizoram House, Shillong chuan Pu Lalnghinglova Hmar hi a tawiawm a ni. 

Sports Minister Pu Lalnghinglova Hmar hian vawiin vek khan North Eastern Council Planning Adviser Pu Som Kamei, Financial Adviser Pu Thanglemlian leh Economic Adviser Pi Sherry Lalthangzo te chu an office-ah kawmin, Sports & Youth Services leh LESDE Department-a thawhhona awm thei hrang hrangte a sawipui bawk a ni.