2384/2024-2025
Aizawl, the 4th October, 2024: Zoram Research Foundation, Mizoram IAS Association leh The Aijal Club-te tangkawp buatsaih, Mizoram tana All India Services Cadre hranpa chungchang zirhona, vawiin chawhnu dar 1:00 a R.B. McCabe Hall, Aijal Club-a neih chu Department of Personnel & Administrative Reforms (DP&AR) Minister Pu K. Sapdanga chuan khuallian niin a hmanpui.
Khuallian Pu K. Sapdanga chuan Mizoram hmakhua ngaia mithiam tak takte'n Mizoram tana All India Services Cadre hranpa chungchang sawihona hun an buatsaih leh program hmanpui tura sawm a ni chu lawmawm a tih thu a sawi a. Tun dinhmunah Mizoramin All India Services sanctioned post IAS 32, IPS 19 leh IFS 19 a neih mek thu leh, Sawrkar laipuiin IAS leh IPS 6 ve ve a rawn dah thar thu a sawi a. All India Services-ah Mizo inziak tling kan tlem zel chu veiawm a tih thu sawiin, Mizoram inrelbawlna kawnga Sawrkar fawng pawimawh leh sang tak tak chelh tur Mizo kan nei meuh ta lo chu tanlak thar nana hman nise a duh thu a sawi bawk.
DP&AR Minister Pu K. Sapdanga chuan State Sawrkar hnuaia a pumhluma All India Services-te an awm theih nan State bil Cadre neih chu thil pawimawh tak nia a hriat thu sawiin, service hun pumpui State danga insawnkual reng lova hmun khata hman hian hnathawh kawngah rah tha a chhuah thei dawn a, Cadre review-te pawh ngaihtuah tel a pawimawh a ni, a ti bawk.
He hun hi Pu Rochamliana, General Secretary, Zoram Research Foundation chuan kaihruaiin Pu P.C. Lawmkunga, IAS (Retd.), President, Mizoram IAS Association chuan inlawmna thu a sawi a. Pu C. Ropianga, IAS (Retd.), Mizoram IAS Association-in thupui a sawi hawn hnuah sawihona hun hman a ni.
He hunah hian Mizoramin All India Services Cadre hranpa a neih loh avanga inrelbawlna kawnga harsatna a tawh thinte, cadre hranpa neih thatna leh that lohna nia langte tawnhriat nei tawhte'n chipchiar takin an sawi a. Mizoram puala All India Services Cadre hranpa neih a hun tawh takzet thu leh Cadre Review Committee ngaihpawimawh tel a tul thute tarlan a ni.
Tun dinhmunah Mizoram hian All India Services (Indian Administrative Service, Indian Police Service & Indian Forest Service) Cadre hranpa a nei lova, AGMUT Cadre-ah a awm mek a. AGMUT Cadre hnuaiah hian Arunachal Pradesh, Goa, Mizoram leh Union Territory-te an awm a ni.
