Nimin (June 21, 2016) khan Tuichawng bialtu MLA, Fisheries Minister Dr BD Chakma chuan Chawngte Community Health Centre (CHC) tlawhin, an dinhmun leh mamawh te a en fiah a. CADC Chief Executive Member Pu Kali Kumar Tongchangya leh Lawngtlai DIPRO Pu C.Lalhruaitluanga te'n an tawiawm.
Minister hi Medical Officer Dr Vanlallawma Khiangte leh a thawhpuite'n an lo dawngsawng a. A hnenah hian damdawi in dinhmun leh an hna thawh dan bakah, an mamawh hrang hrangte an lo thlen a ni.
Dr BD Chakma chuan damlo enkawl hna chu rawngbawlna pawimawh tak a ni a, tha zawk leh chhawrnahawm zawka hna thawk turin mamawh hrang hrang a awm thin a, chuti ang chu sawrkar paw'n a ngaih pawimawh hmasak thin a nih avangin an mamawhte chu inthlahrung lova sawrkara thlen thin turin thawkute chu a chah a. An hawiher leh chet danin damloteah nghawng nasa tak a nei thei tih hria a, damlo an lo dawnsawn danah fimkhur turin a chah bawk.
Chawngte CHC-ah hian khum 20 awmin, X-Ray khawl pakhat an nei a. Thawktu lamah Medical Officer pakhat bakah, Homeopathy leh dental doctor pakhat ve ve an awm a; staff nurse pali, X-Ray technician pakhat leh IV Grade sawm an awm bawk.
Dr BD Chakma hian nilaini (June 22) leh ningani (June 23) zingkarah sikul naupangte nen Kamalanagar khaw chhung kawngpui sirah thing an phun ang a; ningani chhunah Kamalanagar-a Udaygiri Higher Secondary School Governing Body Meeting-ah a tel leh ang.
