Nimin (June 21, 2016) khan Tuichawng bialtu MLA, Fisheries Minister Dr BD Chakma chuan Chawngte khawpui huam chhunga anganwadi centre paruk tlawhin, an dinhmun leh mamawh te a en fiah a. CADC Chief Executive Member Pu Kali Kumar Tongchangya leh Lawngtlai DIPRO Pu C.Lalhruaitluanga te'n an tawiawm.

Dr BD Chakma hi Chawngtea Integrated Child Development Services (ICDS) Project Office-ah Circle Officer Pi Biaksailovi leh a thawhpuite'n an lo dawngsawng a. Chawngte ICDS hnuaia an hna thawh dan hrang hrang bakah, an harsatna leh an mamawhte a hnenah hian an lo thlen a ni.

Dr BD Chakma chuan sawrkarin anganwadi Centre-te mission mode-a a kalpui tawh dawn avangin hlawhtling taka kalpui a nih theih nan hma lak dan tur lungrual taka sawi ho tul a tih thu leh chumi avanga tunah pawh hmasawnna tur zawnga feh chhuak a nih thu a sawi.

Chawngte ICDS-a thawkte chuan anganwadi worker-te'n thil sem tur retailer atanga an lakin, retailer-te'n dan lova pawisa an lo chawitir thin leh worker mahni thawhna hmuna awm lo an awm leh zeuh thin te chu an harsatna a nih thu sawiin, thil sem tur dah thatna tur kudam tha zawk an mamawh thu an lo sawi bawk.

Minister hian Chawngte khawpui huam chhunga anganwadi centre paruk - Kamalanagar-I (naupang 70), Kamalanagar-II (naupang 200), Kamalanagar-III (naupang 111), Kamalanagar-IV (naupang 80), W.Saizawh Centre-I (naupang 21) leh W.Saizawh Centre-II (naupang 30) te a tlawh a. A in leh a hmunhma te, a chhung bungrua leh chaw tha dawn tur an neih dan leh sem dan te a en fiah nghal. He'ng centre tinah hian worker pakhat leh helper pakhat theuh an awm.

W.Saizawhah hian Administrator VCP Pu Dothangliana kaihhruaiin VC House-ah Minister leh CEM te lawmna inkhawm buatsaih a ni a. An hnenah hian khawtlang mamawh hrang hrangte thlen niin, Minister leh CEM te chuan Chawngte-Longpuighat leh Chawngte-Borapansury kawngte siam that thuai tum a nih thu leh Chawngteah town bus thar pahnih tlantir tum a nih thu an sawi.