Olympic Day lawmna chu vawiin khan Pu H. Lalengmawia Kolasib DC hovin Kawnpuiah hman a ni a. Mizoram Olymlic Association Vice President Pu Hmingdailova Khiangte Parl. Secy leh Pu BJ Kariappa High Performance Indian Hockey Coach bakah Olympic Association hruaitute an tel a ni.

Sports lama hmasawn tur chuan infiammite tum a ruh tur a niin nih tur ang tak kan thlen hma-a harsatna a lo awm anih pawhin tumruhna chu a hliah tur a ni lo tiin khuallian Pu H. Lalengmawia chuan Mizo Thalai te Sports lama hmasawnna chu rahbi thar duhawm tak a nih thu leh Mizo thalai tam tak ten hming an lo chher tawh thu a sawi a. Kum 1992 daih tawh khan Barcelona ah Mizo Thal kapthiam Lalremsanga chu Olympic ah a lo tel tawh a; vawiin ah hian kan zingah amah pawh a awm a. Kum 20 ral hnu daih tawh, tun ah hian India Hockey Team, Olympic khel tur zawnna ah Mizo nula a awm mek a; beiseina sang tak kan nei a ni tiin Mizo zingah Olympic Games a hming lam tham kan la tlem hle a ti.

Pu Hmingdailova Khiangte, Mizoram State Olympic Association Vice President pawhin thusawiin kumin hian Olympic Day lawmna hi Mizoram hmun dangah hman a ni lo a; Kumin August thla a Brazil a Olympic Games ah India Mipa leh Hmeichhia te an qualify avanga Hockey India duh dan angin Hockey Mizoram chuan Kawnpui-ah Olympic Day lawmna Hockey Games a buatsaih a; Hmeichhia ah hian Sports Directorate Team leh Sports Council Team an inkhel a; Mipa lamah State Olympic Team leh Hockey Academy an inkhel a ni a ti.

Vawiina Olympic Day hmanna ah hian Mizoram State Olympic Association hruaitute bakah Sports Discipline dang enkawltu te pawh an tel a ni.