School Education Minister Pu H.Rohluna chuan "Mizoram-a kan zirna hi a hniam lova, National level-ah pawh a hniam lo a ni" a ti. He thu hi Tlungvel Higher Secondary School-in HSSLC result 2016 ah zaah za an pass lawmnaah a sawi a ni.

Minister chuan phai a zirlaibu leh Mizoram a kan zirlaibu hman chu a in ang reng tawh thu sawiin, Class I-IV ah chuan NCERT Textbook vek hman a ni tawh thu a tarlang a. Mizoram Sorkarin zirna a ngai pawimawhin, Education Reform Commission report chu tam tak tihhlawhtlin a ni tawh a, tihhlawhtlin zel a ni, a ti a. Tun hnaiah zirtirtu an awmdan tura awm lo thenkhat suspend an nih thu tarlangin, hreh tak chunga kutthlak a ngai chu a vanduaithlak hle a ni, a ti. Pu H. Rohluna chuan nu leh paten fate tana ro an pek theih tha ber chu zir thiamna hi a ni tiin, zirna chu sum invest-na tha ber a nih thu a sawi a.

Tlungvel HSS in a din tirh atanga result tha tak a nei thei zel te, III Division aia 1st leh 2nd Division-a pass a ngah thin zawk te chu lawmawm a tih thu a sawi bawk. Tlungvel HSS result neih that lawmnaah hian bialtu MLA Er Lalrinawma leh Pu K.Lianzuala, Chairman MKVIB te pawhin thu an sawi a ni.

Tlungvel Higher Secondary School hian an din tirh 2010 atangin 2012 tih loh chu kumtin result-ah 100% pass an nei a, kumin hian candidate 36 an neih te chu pass kim vekin Ist ah 20, IInd div ah 10, III div ah 6 an pass a. Teaching staff 6 leh non teaching staff 1 an nei a, tun session kal laiah hian zirlai 50 an nei mek a ni.