India Sawrkar-in India Danpui duangtu zinga sulsutu Dr B.R.Ambedkara piancham vawi 125-na kumin chhunga lawm a lo rel tawh angin vawiin chhun khan Nehru Yuva Kendra, Aizawl, Ministry of Youth Affairs & Sports, Government of India huaihawtin I&PR Auditorium ah Finance Minister Pu Lalsawta’n a hawng.
Minister Pu Lalsawta chuan Dr B.R.Ambedkara piancham lawmna hawnna thu sawiin India rama chi inthliarna thatlohzia hrechianga hmalakna chang lo hria hruaitu ropui Dr B.R.Ambedkara te kan neih avanga hnam hnufualte (Scheduled Tribes, Scheduled Castes, Other Backward Classes) duhsak bikna ram Danpuia an lo dah chu a chhawr tangkai ber kan nih thu te a tarlang a. Amah Dr B.R.Ambedkara ngei pawh hnam hnuaihnung a nih avanga harsatna tam tak pal tlanga mithiam leh mi ropui taka a lo inzirchhuah dan te tarlangin a chanchin atanga Mizo thalai ten zir tur pawimawh tak tak an neih te a sawi lang a. Tumruhna, chhelna leh taihmakna nen hmathlir sang tak insiama theihtawpa tan la turin leh ram leh hnam tana mi tangkai leh chhuanawm nih tum theuh turin thalai rual kalkhawmte chu a chah bawk. “Kan mamawh 90% Central Sawrkarin min tumsak thin hi hetiang ringawt hian kan hnam kan tawp thiang lo tih thalai ten in ngaihtuah a tul a ni”, a ti. Mahni kea ding tur chuan kan thawhchhuah kan rin a ngai tiin Minister chuan tan la thar theuh turin kalkhawmte chu a sawm bawk a ni. Dr B.R.Ambedkara hriatreng nana hun hmanah Mizo hnam pum pawhin chi inthliarna nei lova zalenna karah, boruak tha leh leilung tha tak kan neih kan vanneihzia hriaa, tun dinhmun atanga dinhmun sang zawka ding thei ngei tura theihtawp chhuah turin thalaite chu a fuih a, Mizo fate dinchhuahna chu tuma dan rual a ni lo tiin Pu Lalsawta chuan khawvela dak chhuak phak ngei tura theihtawp chhuah turin Zoram mipuite a chah bawk a ni.
Dr B.R.Ambedkara piancham lawmna inkhawm hi Pu Raj Kumar Joshi, District Youth Coordinator, NYK-in a kaihruai a, Pu S.R.Bishnoi, Zonal Director, NYKS, Mizoram Zone, Pu Lalchhanzova, Chairman, Cod Nerc, Pu K.Lalrinsanga, SBI leh Pu Ralthuama Ralte, Senior Sanitation Officer, Swachh Bharat Abhiyan ten thusawina hun an hmang bawk a, thalai thahnem tak an tel bawk a ni.
