Central sawrkar dawra New Delhi-a cham mek Social Welfare leh Animal Husbandary & Veterinary Minister Dr K.Beichhua chuan Union Minister pahnih - Thawar Chand Gehlot leh Giriraj Singh te hmuin Mizoram sawrkar mamawhte a thlen.

Vawiin chawhma khan Dr.K.Beichhua hian Shastri Bhavan-ah Social Justice& Empowerment Minister Thawar Chand Gehlot hmuin Mizoram chu Myanmar Border, dan lova drugs lakluhna kalkawnga awm a nih avanga harsatna an tawh dan a hrilh a. Ruihhlo leh Zu-ah thalaiten harsatna leh buaina nasa tak an tawk mek tih sawiin he thil thalo laka inven dan tur te, supply reduction chungchanga hmalak dan tur te,  harm reduction atana hmalak dan tur te leh ruihhlo ngaite rehabilitate dan tur te sawiin he harsatna hi Mizoram tan chauh nilo, NorthEast India leh India ram pumpui harsatna a nih thu Union Minister Thawar Chand Gehlot hi a hrilh a ni.

Minister Dr.K.Beichhua chuan Mizoramin Zu leh Ruihhlo avanga harsatna a tawh mek sutkian nana Project an siam thu te, Rehabilitation Centre, Sethawn-ah hmalak tumna  a awm thute Union Minister hi a sawipui a.  Union Minister chuan Mizoram Sawrkar hmalakna chu tha a tih thu leh Rehabilitation leh Skill Development atana DPR-te buatsaih zel turin a lo hrilh a, Ministry chuan fund a neih thu leh a tul anga pek an nih tur thu a sawi a ni.

Hemi ni vek hian Dr.K.Beichhua hian Krishi Bhavan-ah Veterinary & Fisheries changtu Union Minister Giriraj Singh chu a Office ah a hmu a. Mizoramin sa a mamawh za zela sawmruk panga zet chu Mizoram pawn atanga lakluh a nih thu hrilhin sa-a intodelh tura hmalak a tulzia a thlen a. Mizoram sawrkarin project a thehluh Pig Multiplication Centre, Rural Backyard Goatery Development Project, Feed & Fodder Development Programme, Establishment of Nucleas Boar Semen Station Project te tihhlawhtlinsak turin a ngen nghal a, Union Minister hian inhawng taka lo dawngsawngin, tihhlawhtlin a tum thu Dr.K.Beichhua hi a hrilh a ni.

Dr.K.Beichhua hian Mizoram chhunga PRRS- 2013, 2016 leh 2018 a, a len vak avanga vawk nasa taka a thih thu leh hemi avanga mipui harsatna tawh chungchang Union Minister hnenah hian a hrilh a. Myanmar atanga Sawrkar phalna telloa vawk lakluh a nih thin avangin vawk natna hlauhawm tak khawchhaka leng mek - African Swine Flu chu Mizoramah a lo luh a hlauhthawnawm thu te, a lo lut a nih chuan Mizoram chauh nilo, hmarchhak leh India Ram pumpui tana  a hlauhawm thu hrilhin Dr.K.Beichhua chuan Central Sawrkar hmalakna a ngen a.  Union Minister chuan Upmani Basu, Joint Secretary, Livestock Health, Ministry of  Fisheries, Animal Husbandry& Dairying kaihhruai Central Team Mizoram ah tirh a  nih tur thu a lo hriattir a ni.

England atanga Vawk chi tha lakluh kawngah Mizoram hi North East State dangte tan Nodal State a ni a. Foreign atanga vawk lakluh naah Custom Duty  leh Quarantine Fees an chawi a ngaih thin avangin North East State-ten harsatna an tawk mek a. Dr K.Beichhua chuan hemi chungchang pawh hi Union Minister sawipuiin Union Minister chuan Custom Duty leh Quarantine Fees awl a nih tur thu a sawi. Rashtriya Gokul Mission leh National Programme for Dairy Development te Mizoramah tluang taka kalpui a nih theih nan harsatna awm theite sutkian pui a tum thu Union Minister hian a lo sawi bawk a ni. 

Union Minister te a dawr na ah hian Minister Dr.K.Beichhua hi Mizoram House Resident Commissioner Ajay Chaudhuri, IPS,  New Delhi leh Official dang ten an tawiawm a ni.