No.1452/2020-2021

Mamit 29th May, 2020 : Vawiin khan Dr. K. Beichhua, Hon’ble Minister, AH & Vety, SWD, Excise & Narcotics, Sericulture Department chuan Mamit District chhung khaw hrang hrang a tlawh.

Dr Beichhua hian Mamit khawpui chhunga AH & Vety Office tlawhin AH & Vety Office Complex-ah DC leh SP bakah AH & Vety Office-a thawktute’n an lo dawngsawng a. Thu sawiin mahni intodelh nana hmalak a tul thu leh Politics ang ni lova, a hnam ang leh mimal thahnemngaihna-a kan nitin mamawh ei leh bara intodelh a pawimawh thu a sawi a. Sorkar thupek zawma ngaipawimawh zel tura kalkhawmte chahin hrileng mek laka kan himna turin mimal tin te’n Sorkar thupek zawm chu kan mawhphurhna a ni tih hria a, chu mawhphurhna chu kan hlen theuh a pawimawh thu a sawi bawk. COVID-19 hrileng laka dam khawchhuah chu Number 1 a kan dah a pawimawh a, hrilen zawh hnuah tam lo thleng thei laka kan him theih dan tur ngaihtuah a, buh leh bal, ransa leh thlai thar chhuah kawnga kan intodelh zel dan turah ngaihtuahna kan sen a tul thu sawiin Lockdown avangin SEDP hmalakna pawh eng emaw chen tihtawp lailawk a ni a, chutihrualin, ei leh bara kan tharchhuah tam theih dan tur Sorkar-in a ngaihtuah mek zel a ni a ti bawk. COVID- 19 dona kawngah a lian leh te an awm lova, angkhat leh inlungrual taka tangho turin mipui zawng zawngte a sawm bawk.

Er. H. Lalzirliana, Vice Chairman, Roads & Infrastructure Development Board pawhin thu sawiin COVID-19 hrileng mek chu Politics lama advantage lakna chi a ni lova, Party Politics ni lovin a hnam anga kan do tlan ngai anih thu a sawi a. Sorkar ruahmanna ang zelin mitinte’n a hnam anga tan kan lak a ngai a, VLTF-te hmalakna leh thawhrimna, khawtlang tana an inpekna chu faktlak a nih thu a sawi bawk a ni.

Minister hian W. Phaileng khua tlawhin tunlai hrileng mek avanga Village Level Task Force duty-te a tlawh a. Pu Beitlotha Nohro, BDO, W. Phaileng kaihhruaina hnuaiah khawtlang hruaitute nen programme tawi hman a ni a. Minister hian Suarhliap, Saikhawthlir leh Chuhvel khuaa VLTF - duty-te a tlawh nghal bawkin khawvel puma hripui leng mek laka kan ram leh hnam himna tura hah taka ramri-a duty-te chu fakawm a tih thu a sawi a, an awm hmuna tlawhchhuah hrim hrim chu tula a hriat avanga tlawh a nih thu sawiin tha thlah lova he hripui laka kan him theih nana theihtawpa duty chhunzawm zel turin a fuih bawk a ni.

Minister hian VLTF-te hnenah an mamawh tur Hand Sanitizer, Face Mask bakah Silpauline a hlan nghal bawk.

Minister hi Pu C. Lalmuanpuia, Vice Chairman, Veterinary, Fisheries & Sericulture Board, Er. H. Lalzirliana, Vice Chairman, Roads & Infrastructure Development Board, Pu K. Liandinga, Vice Chairman, Social Defense & Rehabilitation Board, Sorkar Officials thenkhat bakah khawtlang hruaitute’n an tawiawm a ni.