No.1451/2020-2021

Aizawl, the 29th May 2020 : Vawiin khan Mizoram Science, Technology & Innovation Council (MISTIC) leh Institute for Bioresources and Sustainable Development (IBSD, autonomous institution under Department of Biotechnology, Govt, of India), Mizoram Centre-te tangkawpin 'Sustainable Utilisation of Bioresources for Socio-Economic Development of Mizoram' tih thupui hmangin Directorate of Science & Technology, Mizoram New Capital Complex-ah kan rama bioresource kan neihte tangkai zawka hman dan tur sawihona meeting an buatsaih.

He meeting hi Dr. C.Vanlalramsanga, Secretary, Planning & Programme Implementation (Science & Technology) Department chuan a kaihruai a. Mizorama kan resource-te hi ram economy tichaktu atana hman tangkai a tulzia sawiin, thawhhona tha zawk neih a tul thu a tarlang.

IBSD Director Prof. Pulok K Mukherjee chuan meeting online-in a rawn chhim a, thu sawiin IBSD chungchang leh hmalakho theihna tur chi hrang hrang sawihawnna a nei. Dr.K. Jeyaram, Scientist-E in IBSD hnathawh hrang hrangte leh Mizoram centre bika an hnathawh chungchang presentation a nei chhunzawm nghal a ni.

Meeting-ah hian Mizoram leilung hausakna, a bikin ramhmul leh thilnung chi hrang hrangte (bioresources) kan ram leh khawtlangin hmasawnna atana kan hman theih dan tur ngaihtuah ho a ni a. Science thiamnate, research-te leh sumdawnnate (entrepreneurship) hmanga kan ram hausaknate tangkai zawka hman theih dan tur sawiho a ni. Mizorama hetiang lam buaipuitu department, zirna in leh sumdawngte chak zawka thawhho an rel. Dr. R.K. Lallianthanga, Chief Scientific Officer chuan Science & Technology Department hmalakna sawiin Bioresources Centre din tura hmalak mek a nih thu leh project proposal Department of Biotechnology, New Delhi-ah thehluh a nih thu a tarlang a, kalkhawmte hnenah hian lawmthu a sawi a ni.

He meeting-ah hian Sawrkar Department hrang hrang Forest, Environment & Climate Change, Horticulture, Agriculture, Science & Technology aiawhte, zirna in hrang hrang Department of Biotechnology, Pachhunga University- College, Department of Biochemistry, Zirtiri Residential Science College, Department of Pharmacy, RIPANS aiawhte, Mizoram State Biodiversity Board, State Medicinal Plants Board, Mizoram University Bio-NEST Incubation Centre aiawhte leh Industry lam aiawh Biodevelopment Centre Mizoram leh Zoram Mega Food Park te meeting-ah hian an tel.