Tukin chawhma dar 7:30AM khan Dr. K. Beichhua, Excise & Narcotics Minister chuan Siaha-a Asst.Commissioner of Excise & Narcotics Office, Meisatla a tlawh.

Inkhawm tawite neih niin, Pu Lalhmingthanga, Assistant Commissioner of Excise & Narcotics, Siaha in a kaihhruai.

Minister chuan thusawiin, "Zoram hmun hrang hranga Excise & Narcotics Office ka tlawh a min tihlim em em tu chu, kan sipaite leh staff te hmel thar ka hmu zel hi a ni. Tunhma chuan kan sipaite leh staff te chu ruihlo in a tibuai hmel pu ngawih ngawih an tam a ni," a ti.

Sawi chhunzawmin Minister chuan, "Kan sawrkar atanga rei lote ah mipuite hnena kan tiam ang ngeiin Zu zawrh kan tihtawp nghal a, kan Chief Minister zahawm tak pawhin ruihlo do leh enkawl zui ngaite chhawmdawl hi hna pawimawh hmasa berah a nei a, a lawmawm hle. Enforcement lam indaih loh hle mah i la, Pathianin kan hma a hruai tlat ang a, Kohhran leh NGO's te kan hnungah an awm reng bawk a; Home Department lam paw'n min puih an huam reng a ni," a ti.

"Ram leh hnam dinchhuahna bul hi mi tlemte thawhrimna leh huaisenna rah a lo nih tlangpui thin. Mizoram Excise hi tlem hle mah i la, kan hnathawh leh kan raldo-ah kan chian a,  kan hna hi rinawmna leh inpumpekna nen I thawk theuh ang  u," tiin, Quantity aia Quality a pawimawh zawk thu a sawi. Israel sipai hi tam loh mahse sipai chak tak an din theih thu hmangin fuihna thu a sawi bawk.

Sawrkarin Department mamawh a hriat thu leh Staff te pawh a tul anga lak belh zel tura hmalak mek a nih thu Minister hian a sawi bawk.

Tukin zing vek hian Minister chuan Taxation Office Complex tlawhin, Office sakna hmun tur a enfiah a, ICDS Office Building, Meisavaih a sak mek pawh a tlawh nghal a ni.

Minister hi Pu HC. Biakcheua, MDC; Pu N. Lalrosanga, MDC; Pu Rozawna, Joint Director, Sericulture; Pu H. Ramdinliana, Member, Veterinary & Fisheries Board; Pu Lalthankima, AE, SWD;  Pu Abraham Beirazi Khithie, PS to Minister & Under Secretary, SWD,  Siaha a sawrkar official te , chanchinbu mi te leh MNF Siaha District Headquarters hruaitu thenkhat ten Minister hi an tawiawm a ni.