Vawiin khan September ni 5 a Zirtirtute Ni hman dan tur chungchang relin District Working Committee chu Addl DC Pu Alexander V. Chongthu kaihhruainain Circuit House Conference Hall-ah an thukhawm.

Meeting chuan thingtlang khaw te deuh Zirna In pa 2/3 awmnaah chuan Zirtirtute Ni chu VC te leh SMC te nen a huhova hman dan tur rel nise an ti a, khawpui ah erawh chuan mahni school theuhah hman nise tiin a rel a. Kum danga an tih tawh thin angin School hrang hrangah Teachers'  Day lawmna hi hmanpuitu  awm se tiin an rel a, School hrang hrang a hmanpui tur lo tifel turin DEO an ruat nghal a. School 3 hnenah Award sem tur awm chu ngaihpawimawh nise tiin an rel tel bawk. Pu C. Lalbiakzauva DEO Champhai hnen atangin Teachers'  Day a sum an lo sen tawh dan leh sum thawhkhawm a nih dan te ngaihthlak a ni.

Meeting-ah hian Banner  veng lun lai deuhah tar a lo nih tawh dan te ngaihthlak niin tar leh ngei nise an ti a, Slogan tar leh tar loh chungchang pawh sawihovin slogan tar thei tur school te chuan khawtlang tana hnawk lo zawnga tar nise tiin an rel bawk a ni. NFTW tuak dan tur sawihovin State Working Committee in a lo rel tawh angin zirtirtute'n cheng 50 theuh thawhin zirlai naupangte erawh chu cheng 30 aia tam lo thawh thei chuan thawh nise tiin an rel a, sum tuak belhna atan Car Flag siam nise tiin an rel a, buaipui tu atan GMHSS te an ruat a, hetihlai hian NFTW tana sum lakkhawm thin hi Teachers Day hmanna atana tih nia ngai tam tak an awm thin a, NFTW hi zirtirtu minharsa zual te tanpuina tura thawhkhawm thin a nih thu tarlan tel a ni bawk a ni.

Teachers'  Day-ah Zirlai naupangte chu Zirtirtute an chawimawi a ni tih entirna turin Zirlai naupangte'n Zirtirtute hnenah thilpek hlan nise,  thil man to tak erawh chu inpek ni lo se tiin an rel a. Thilpek hlan tur man bituk a, naupangin an duh duh zirtirtu pe lovin pek tur ruat ni bawk se,  rualkhai thei ang bera kalpui tura hmalak nise tiin Meeting chuan  a rel a ni.