Vawiin khan South Tuipui Assembly Constituency bialtu MLA leh Health & Family Welfare Department, Higher & Technical Education Department leh Commerce & Industries Department changtu Minister  Dr R. Lalthangliana chuan Chhipphir leh Bualpui V khua  te tlawhin hmasawnna hnathawh tul hrang hrang a hmunah a enfiah a, khawtlang hruaitute leh khaw mipuite kawmin hmalak dan tur a sawipui. Minister hi Lunglei East bialtu MLA HPC Vice Chairman Pu Lawmawma Tochhawng, Lunglei DC Pi K Lalrinzuali, SP Pu C Lalthanmawia, CMO Dr Thani Pachuau leh District official engemawzat, Lunglei MJA hruaitute leh Aizawl atangin ZOHANDCO Chairman Pu C. Lalrammawia, Pu Vanlalzawma Ex MP, Pu Lalrinsanga Jt Secy DP&AR(GSW), Dr Eric Zomawia, Mission Director NHM leh official dangte bakah party hruaituten an tawiawm a ni. 

A khaw tlawh ah te hian Minister hi khawtlang mipui thahnem takin lo hmuakin Chhipphir leh Bualpui V Community Hall-ah te mipui nena inkawmhona hun tha tak an hmang a. Dr R Lalthangliana chuan mipui kalkhawmte chungah lawmthu sawiin Hnahthial District thar hmasawnna tura hmalakna leh hmachhawpte a sawipui a ni. Chhipphir PHC ti changtlung zel turin X-ray technician, quarter sak belh, staff nurse leh Health Supervisor dah kawngah te hmalak a nih tur thu a sawi a, Hnahthial District tharah Hnahthial CHC pawh District Hospital-a hlan kai theih tura buatsaih a nih mek thu a sawi a ni. Delhi a tlawh tuma World Bank hotute a kawm thu pawh sawiin Minister chuan Health Department hnuaia PHC leh CHC te Solar power dah sak tura hmalak a nih thu a sawi bawk a. District inkalpawhna  kawng tha nei turin ruahmanna siam mek a ni, tiin Hnahthial - Haulawng road siam mek a nih thu leh Pangzawl - Mat - Lungmawi road pawh a rang thei ang bera sial a nih dawn bakah kawng awmsa te pawh thawm that a nih tur thu a sawi. Zirna kawnga hmalakna turte pawh sawilangin Chipphir Higher Secondary School lump sum grant-in-aid ni mek chu Government Aided School ah dah thuai a beisei thu a tarlang a. Hnahthial District thar chuan District chhunga khua hrang hrangah te hmasawnna nasa tak a thlen dawn a ni tiin District-in a ken tel office hrang hrang DC, Police, leh kuthnathawktute hmasawnna kawnga thawktu - Rural Development, Agriculture, Horticulture, Irrigation and Water Resources, AH&Vety leh Department dangte ti puitling thuai tura hmalak zel a nih thu a sawi bawk. 

Ram tihmasawn zel turin mipuiten chanvo leh mawhphurna pawimawh tak an nei Dr.R.Lalthangliana chuan a ti a. Socio Economic Development Policy (SEDP) kaltlangin mipuite mahni kutkawih ngeia an din chhuah theihna tur leh hemi kaltlanga eizawnna ngelnghet an neih theihna turin hmalak a ni dawn a ti bawk. Heng hmalakna leh hmachhawpte ti puitling turin sawrkar policy chu mipuiin thinlung taka an thlawp a ngai a ni, a ti a, mipui kalkhawmte chu inpawhtlang taka hmalak puiah Minister chuan a sawm a ni.

Dr. R. Lalthangliana lawmna inkhawmah hian amah tawiawmtu HPC Vice Chairman Pu Lawmawma Tochhawng, ZOHANDCO Chairman Pu C. Lalrammawia, Lunglei DC Pi K Lalrinzuali leh Ex MP Pu Vanlalzawma ten thu an sawi a ni.

Minister leh amah zuitute hian chawhnu khan Serchhip panin Bualpui V an chhuahsan a, Serchhip ah hian H&TE Minister hian Government Serchhip College a tlawh haw dawn a ni.