Vawiinah Dr. K. Beichhua, Hon'ble Minister chuan Siaha khaw pawn lama a bial chhung Amôtlâ tlangdung te dinhmun leh harsatna te enfiah in a tlawh. Tihian Minister chuan a bial chhunga VLTF te a tlawh kim ta.

Minister hian Tipi Ferry, Riasikah, Amôtlâ, Thiahra, Tisopi-I&II VLTF te kawmin an hmalak tawhna leh dinhmun te a hmunah a enfiah. Khaw/Veng tina VLFA te hian an harsatna leh mamawh thil te Minister hnenah an lo thlen a, Minister chuan kan Chief Minister zahawm tak kaihhruaina hnuaiah a tul ang zel a mipui tan chak taka ke an pen zel tur thu sawiin, Sawrkar leh Task Force te thuchhuak chu tha taka zawm zel turin mipuite a chah.

Minister chuan a bial chhunga VLTF te inpekna leh taimakna fakin mipuite thuawihna avanga tun dinhmun thlenga harsatna lian tham hriat tur awm lo chu lawmawm a ti thu a sawi.

Minister chuan, "COVID-19 hian ram hausa leh thiltithei te a dim hauh lova, khawvel Economy dinhmun a tlahniam duak duak mai a ni. Keini ram kilkhawr leh Economy innghahna bulfuk nei lova mi fate tharchhuah sa ringa khawsa, damloh inenkawlna hmanraw nei mumal lo leh enkawltu mithiam indaihlohna hi min rawn luhchilh vaih chuan kan chan a chau hle ang. Chuvangin kan ti thei sang ber leh himna kulh awmchhun chu theihtawpa lo inven a, sawrkar thupek leh hmalakna te tha taka zawm hi a ni," a ti.

Sawi chhunzawmin Minister chuan, "CM Relief Fund leh MLA Fund atanga tanpuina kan inpek ang ang te hi renchem leh hlawk theih ang bera hmang turin ka ngen a che u. Midang thawhchhuah sa lakluh theih loh hun leh lei tur a awm tawh loh hun a thleng thuai dawn. Chumi hunah chuan kan hmabak chu tam a ni mai. Chuvangin hun khirh leh harsa zawk hmachhawn thei tur leh damkhawchhuah theihna turin chhungtin leh mitinte awm mai mai lova tharchhuah nei theuh tum a hnathawk tlut tlut turin ka chah tak meuh che u. 

"Social Distancing tha leh him ber chu tumah hnaih lova mahni huan leh thlawhhma a hnathawk daih mai hi a ni. Mifing chuan chhiatna hi malsawmna-ah an chantir hlauh thin. He khawvel chhiatna kan hmachhawn mek hi mahni chhungkaw leh khua te intodelh thei tura  tan kan lak a tulzia min hriatchhuahtirtu-ah i hmang hlauh ang u. He hunah hian rim takin thawk i la, keini chhung bakah midang harsate tanpuitu nih theih turin ke i pen theuh ang u. Tun hun khirh takah hian nangni leh keini tih a thiang lova, Political Party inthliahhran hun a ni hek lo. Kan damkhawchhuah nan kan zavaiin inhmangaihtawnna nen i thawkho tlat ang u. Kan mipuite riltam a in awm hi sawrkar chuan a ngaingam lova, kan damkhawchhuahna hi Politics pawimawh ber a ni. Chuvangin a tul ang zelin MLA LADS Fund te pawh kan hmang chhunzawm zel ang a, kan Chief Minister zahawm tak leh ka thawhpui zawng zawng te pawn Zoram mipui chhuanchhama kan awm lohnan remchanna awm thei apiang an dap mek zel a ni," Minister chuan a ti.

Vawiin a bial fanna a VLFA tin te hnenah Chief Minister Relief Fund atangin Rs. 10,000 theuh a sem a; MLA Fund atangin Tipi Ferry, Amôtlâ, Thiahra, Tisopi-II te tan Buhfai Bag 3 theuh; Riasika leh Tisopi-I tan Buhfai Bag 2 theuh; Amôtlâ leh Thiahra VLFA te tan Silpauline pakhat theuh a hlan nghal bawk.

Minister chuan a bial mipuite tan a ti thei ang ang ti zel a tum thu leh an dinhmun leh harsatna te inthlahrung hauh lova bialtu MDC kaltlangin emaw amah ngei pawh phone hmanga hriattir zel turin VLTF te a chah a ni.

Minister hi Pu HC. Lalmalsawma Zasai, Opposition Leader, MADC; Pu HC. Biakcheua, MDC; Pu N. Lalrosanga, MDC; Dr. Sahlu Khaila, DVO; Pu N. Vabeiratlua, IPRO; Pu NT. Thatlua, Ex-MDC; Pu M. Baithai, President MJA Siaha; Pu Francis Lapi, Joint Secy, MNF Siaha District leh midang ten an tawiawm a ni.