No.1562/2020-2021

Aizawl, the 1st June 2020 : Mizoram Eklavya Model Residential School (EMRS) Society meeting hmasa ber chu vawiin khan Social Welfare Department changtu Minister Dr. K. Beichhua, he Society Chairman ni bawk kaihhruaina hnuaiah SAD Conference Hall, MINECO-ah neih a ni.

Meeting-ah hian EMRS kalphung hrang hrang te, zirna kawnga tribal naupangte an hnufual bik loh nan Ministry of Tribal Affairs, Government of India bultuma kalpui a nih dan te leh Mizoram a EMRS kalpui dan te inhrilhhriat a ni a. Eklavya Model Residential School mipuiten an hmelhriat theih nan hmalak dan tur te pawh meeting-ah hian sawiho a ni.

EMRS din nan hian khawtlang (community)-in 20 acres a zau ram an pek (donate) a ngai a. Tlang ramah EMRS pakhat sak nan Rs. 24.00 crore zel Ministry of Tribal Affairs hian a ruahman thin a. EMRS-ah hian naupangte hi a thlawnin zirtirna pek an nih bakah, uniform, lehkhabu leh an mamawh chi hrang hrang te a thlawn veka pek an ni a. Residential School a nih angin naupangte hostel-ah awm vekin, an ei leh in pawh a thlawn veka pek an ni bawk. Ministry duh dan angin EMRS te hian Central Board of School Education (CBSE) zirtirna leh a Board hi an zawm vek a ni.

Mizoramah hian EMRS hi Serchhip leh Lungleiah te kalpui mek niin zirlai thahnem tak an nei mek a. Academic session tharah EMRS hi Ngopa, Lawngtlai leh Chawngteah te hawn a nih theih nan hmalakna a kal mek a. Heng bakah EMRS sak lai mek leh sak tan tur 6 a awm a. Chungte chu Tuipang, Tlangnuam, Bilkhawthlir, ZawInuam, Tlungvel leh Niawhtlang-ah te a ni.