No.1563/2020-2021

Dated Serchhip, the 1st June, 2020: Vawiin hian Serchhip District Task Force on Covid19 te chu an Chairman Dr. Lalzirmawia Chhangte, IAS hovin DC Meeting Room ah an thukhawm a, Lockdown hmabak awm leh tur leh chumi atana dan hrang hrang te thlir hona an nei a, district chhunga quarantine mek dinhmunte a sawi ho bawk.

Dr. Lalzirmawia Chhangte chuan, Serchhip district mipuite thuawina leh sawrkar an thawhpui thatna avangin Covid-19 laka invenna hmalakna hrang hrangte a kal tluang hle tih sawiin; Sawrkar hnathawk, Covid dona kawnga mawhphurhna hrang hrang neitute thawhrimna fakin hmabak hna la awm te pawh tha taka thawk zui zel turin a ngen a ni.

Dr. Lalzirmawia Chhangte hian Lockdown thar, June ni 30 thleng atana puan thar leh kalpui dan chungchangah ram pum huap dan leh Mizoram bik dan hriatpawlh hlauhawm tlem a awm tih a sawi a. National huapah June ni 8 atanga sakhaw hmunte hawn theih tih a nih laiin Mizoramah chuan inkhawm leh punkhawmna lam chi khap zel a la ni a, inneih leh mitthi vuiah mi 20 chin erawh phal theih a ni a. Zan curfew chungchangah pawh National ah chuan zan dar 9 atangin tih a nih laiin Mizoramah chuan zan dar 7:30 pm atanga zing dar 4:30 am a ni thung a, vawiinah he order hi tihchhuah nghal a ni nghe nghe a. Tin, mi 5 aia tam pun khawm khap thupek a la nung reng a ni, tiin Lockdown dan thar hriatpawlh hlauhawm zual nia a hriatte a tarlanga, sawrkar leh mimal office a thawkte chuan Aarogya Setu-a in register vek tur a nih thu a sawi bawk. Tin, mipuite hriattur thuthar thehdarh kawngah fimkhur a tul a tih thu tarlangin mipuite tithlabar thei thil laka inven tha a tih thu a sawi bawk. Heng te bakah hian Lockdown dan thar hrang hrang te zirhona neih nghal a ni.

He hunah hian Report hrang hrang ngaihthlak a ni a. District chhunga Quarantine Facility Centre te hi nitin medical incharge ten an tlawh a, COvid-19 kher ni lo natna danga harsatna an neih te pawh ngaihven reng an ni a, tin, Facility a awm zawng zawng leh lo haw leh tur te zawng zawng pawh Rt PCR test vek tawh tur a nih angin swab sample hi vawiin atangin an lakhawm tan a. Tun hnaia lo haw RAT Reactive tlem azawng awm te pawh naktukah an Rt PCR Result hriat theih beisei an ni. Police ten Centre tinah Security duty an dah vek a, State pawn atanga rawn haw district chhung paltlang zawng zawng te venhimna (escort) an pe vek bawk. Tin, Covid19 dan bawhchhia an man tawh zawng zawng mi 420 te atanga pawisa chawi (fine) tlingkhawm chu Rs. 70,000 a tling tawh bawk. Hei hian VLTF te chawi tir a huam lova, VLTF te lakkhawm zat chiah hi a la hriat fak theih loh deuh a ni.

Tun dinhmunah district mi lo haw tawh zawng zawng hi mi 290 nia chhinchhiah a ni a, an zinga 79 ten quarantine hun an hmang zo tawh a, khung mek mi 211 la awmin an zinga 7 hi mahni ina inkhung phalna pek an ni. Lo la haw tur hriat theih chinah 100 aia tam deuh la awmin la pung zel thei a ni thung. State pawn mi district chhung atanga an state a thawn haw tawh hi 152 an ni a, tuna la tangkhang mek 530 awmin heng mite hi Construction company hnuaia hnathawk an ni deuh vek hlawm a, a hranpaa eiin pek ngai lo an ni.

Quarantine Facility a awm te tizangkhai thei thil engemaw ngaihtuah tha tih tlan a ni a, hemi atana remchang tur thil hi ngaihtuah tum a ni.