No.5851/2020-2021

Mamit 7th October, 2020 : Dr. K. Beichhua, Hon'ble Minister, AH & Vety, Social Welfare Department, Excise & Narcotics Department leh Sericulture Department changtu chuan Govt. Mamit College-a Schedule Tribe Girls Hostel chu khuallian niin vawiin khan hawng.

Khuallian Dr. K. Beichhua, Minister chuan thu sawiin Mamit District tana tangkai tak tur Girls Hostel Building tha tak mai hawn a ni ta chu lawmawm a tih thu a sawi a. District pawn atanga zirlaite'n tangkai taka an hman a duhsak thu a sawi bawk. Minister chuan tunlai hrileng mek Covid-19 laka kan him theihna leh inven theihna awmchhun Mask vuah leh Social Distancing ngaipawimawh thar leh theuh tura kalkhawmte sawmin hrileng dona kawnga Mamit mipuite'n Sorkar an tawiawmna-ah lawmthu a sawi nghal bawk.

Minister chuan Mamit District chu Aspirational District anihna atanga khaichhuah anih theih nan theihtawpchhuah zel tura chahin Sorkar pawhin Mamit District tan theihtawp a chhuah mek thu a sawi a. Mizoram Sorkar chuan hrileng avanga hmalakna duh angin kalpui thei lo mahse mipuite hmasawnna turin theihtawp a chhuah zel a. SEDP hnuaiah damlote'n Cheng Nuai hnih (2) thleng an bill theihna tur Health Care Scheme chu a kum hnihna atan kalpui mek a nih thu a sawi a. Social Security hnuaiah Social Rehabilitation Board din niin mi 1000 awm theihna tur Sethawng-ah siam mek anih thu a sawi. Poshan Abhiyan-ah Social Welfare Department Officials-te thawhthatna azarah lawmman pawisa fai 2.5 Crore kan dawn tawh thu a sawi bawk.

Dr. K. Beichhua chuan Mizoram Sorkar leh Central Sorkar inkara leilawn pakhat chu Social Welfare Department anih thu sawiin tuna Hostel hawn tak pawh Ministry of Tribal Affairs atanga hmuh anih thu a sawi a. Zirna chu hnam changkang kan el ve phakna kawng awmchhun anih thu sawiin Mamit College zirlaite chu theihtawpchhuaha zirna kalpui turin a chah bawk a ni.

He hun khualzahawm ni-a hmanpuitu Er. H. Lalzirliana, Mamit Bialtu MLA pawhin Hostel Building hawn a ni thei ta chu lawmawm a tih thu a sawi a. A chhung bungraw tul ang angte ngaihtuahsak turin Social Welfare Department hotute chu a ngen a. Mamit District chu Aspirational District kan nihna atanga kan chhuah theih nan Responsible Citizen ni tura chahin kan ngaihtuahna Level tisang a, kan thiamnate kan District leh ram tana hmang tangkai turin a sawm a. Mamit College a thawktute chu nasa lehzuala tan la a, mi thiam leh chhawrtlak chherchhuak turin a chah nghal bawk.

Vawiin Girls Hostel hawnna hunah hian Dr. Lalrozama, IAS, Mamit District Bawrhsap leh Pu M.S Dawngliana Hnamte, Principal, Govt. Mamit College-te chuan thu an sawi ve bawk.

Pu C. Nunsanga, Managing Director, Northeast Consultancy Services chuan Technical Report pein ST Girls Hostel hi 186.93 Lakhs senga sak niin Tribal Hostel Scheme neih atanga Social Welfare Department kaltlangin Project hi siam a ni a. A Building hi March 2016-ah sak tan niin June 2019 khan sak zawh a ni. Building hi chhawng hnih (G+1 Floor) niin Ground Floor hi 161 Sq.m a ni a, First Floor hi 205 Sq.m niin khum 24 awm theihna Room 6 dah a ni. Water storage tank 10000 litre dah theih tura ruahman a ni bawk.

He hun hi Pu H.L Rochungnunga, IAS, Commissioner & Secretary to the Govt. of Mizoram, Social Welfare & Tribal Affairs-in kaihhruaiin Pi A. Vanlalzawni, Jt. Director, SWD chuan kalkhawmte hnena lawmthu sawina neiin Building hawn tak furnish-na turin Contingency atanga ngaihtuahsak an nih dawn thu a sawi nghal bawk a ni.

Vawiin vek hian Minister hian AH&Vety Department Mamit-a Vety Hospital leh Godown sak mek tlawhin Excise & Narcotics Department Office-te a tlawh nghal bawk.

Dr. K. Beichhua, Minister hi Pu K. Liantlinga, Vice Chairman, Social Development and Rehabilitation Board, Commissioner, Excise and Narcotics leh Director, Vety Department bakah Officials dangte leh khawtlang hruaitute'n an tawiawm a ni.