No.5850/2020-2021

Lawngtlai, Khuangchawi thla ni 7, 2020: Vawiin khan Lawngtlai District Water & Sanitation Mission (DWSM) chu a tum hnih nan an Chairman, Lawngtlai Bawrhsap Dr Andrew H. Vanlaldika hovin DC Conference Hall-ah an thu khawm.

Chairman Dr Andrew H. Vanlaldika chuan DWSM chu Lawngtlai District chhunga thingtlang khuate'n tui thianghlim hnianghnar tak an hmuh theihna tur leh fai leh thianghlim taka an awm reng theih nana mawh phurtu a nih angin, member-te chu ngunthluk taka ngaihtuahna seng turin a chah a. PHED Lawngtlai WATSAN Division-a Sr Executive Engineer Er Netralal Jaisi chuan Jal Jeevan Mission (JJM) leh Swachh Bharat Mission-Grameen (SBM-G) hnuaia hna thawh kal mek report pein, PHED Lawngtlai WATSAN Division-a Sub-Divisional Officer Er T. Mangliandinga chuan kum 2020-21 chhunga hna thawh tur ruahmante a sawifiah a. Sawi hona hun hman chhunzawm a ni.

Vawiin thut khawmah hian JJM, SBM(G) leh Convergence hnuaia hna kal mek leh hmachhawpte sawi ho a ni a. Hmasawnna ngelnghet leh tlo a awm theih nan department hrang hrang inhriat pawh tawn a, inthawhpui tawn (convergence) a pawimawh thu tar lan niin, Department hrang hrang scheme atanga thawh ho dan turte pawh sawi ho nghal a ni a. PHED hnuaia tui lak hna thawh a nih rualin, tuihna humhalh tura thing phun uar leh a awm sa humhalh a pawimawh thu sawi lan a ni bawk.

Jal Jeevan Mission (JJM) hnuaia kum 2024 hma ngeia thingtlang in tina tui connection (Functional Household Tap Connection) pek kim turah kum 2019-20 chhungin Lawngtlai WATSAN Division hnuaia khaw 35-a in (household) 4786 tinzawn niin, September 2020 thlenga FHTC pek fel tawh zat hi in 3467 a ni a. Kum 2020-21 atana khaw 13-a in 1321 hnena FHTC pe tura ruahman pawh hna thawh tan mek a ni a. Hei bakah hian Lawngtlai District chhung ni si, PHED Siaha WATSAN Division hnuaia awm, Sangau RD Block hnuaia khaw 4-ah te kum 2020-21 chhung atana FHTC 1633 pek hna chu Siaha Division-in an thawk ve dawn bawk a ni.

SBM(G) hnuaia No One Left Behind (NOLB) kalpui turah kum 2020-21 chhungin Lawngtlai WATSAN Division hnuaia khaw 20-a chhungkaw 1039 tan inthiarna (individual household latrine) saksak tura ruahman niin, inthiarna sakna tur hi unit khat zelah Rs 12,000/- a ni a. Vantlang inthiarna (community sanitary complex) thar sak nan khaw 15 tan Rs 2,10,000/- theuh leh khaw 12-a a hlui thawm that nan Rs 44,500/- theuh ruahman a ni bawk.