Vawiin chawhma dar 11:00Am khan Government Saiha College, Siaha a Scheduled Tribe Girls' Hostel chu Dr K. Beichhua, Minister of State, Government of Mizoram chuan a hawng. He Hostel hawnna programme hi Pi Vanlalpianpuii, Director, Women & Child Development chuan a kaihruai a ni.

Vawiin Scheduled Tribe Girls' Hostel hawngtu leh khuallian ni bawk chuan thu sawiin,  Siaha district-ah hian infrastructure lama hmasawnna hi simeikhu angin a lo de  ve zeuh thin mahse, hmasawnna tluantling hi rilru lamah a intan thin  tih hi i hre reng ang u. Pathian malsawmna dawng tlaka kan awm hmasak a ngai, politics hi i la ulh lovang u, a ti.  Doctor ka ni a, Health portfolio ka chan ringtu pawh in tam tih ka hria, mahse Social welfare ka chang hi Pathian remruat zawk a lo ni. Article 275 hnuaiah hian kan state, kan district hmasawnna tur hna tam tak a thawh thei dawn a ni. Tunah hian project tam tak thehluh tawh a ni a.Chung zinga chuan Eklavya Residential Model school 5,  pakhat sak nan  Cheng vaibelchhia Rs.24/- zel te,Lunglei Mara Girls' Hostel   Rs.210 lakhs man te, Centre for Sports Football & Boxing zirna  Rs. 5 crore  man te, Siaha Vety Farm  Rs.100 lakhs man project te hi hlawhtlinna hmuhthuai beisei a ni, a ti.

Dr.K. Beichhua chuan kan tlangval  ho pawh in tan nasat a ngai, in tan viau lo chuan tuna tanga rei lo te-ah chuan in nupuite chawmhlawmin in awm palh ang tih a hlauh awm, a ti bawk.

Pu C. Nunsanga, Managing Director (Admin) Northeast Consultancy Services chuan Technical Report pein, he Scheduled Tribe Girls' Hostel hi kum 2016 june thla atanga sak tan niin December 2017 ah sak zawhfel a ni, a ti a. He Building hi zopa chhiara chhawng thum a ni a, khum 26 len theihna tura duan a ni tiin, CPWD leh Social Welfare Department Guidelines angin he Hostel hi Barrier Free a siam a ni, a ti bawk. He Hostel sakna hi Ministry of Tribal Affairs, Government of India atanga hmuh a ni a, Social Welfare Department, Government of Mizoram chu Nodal Department an ni a, Building sak hnah hi Northeast Consultancy Services (NECS) ten  thawkin, he Hostel hi 447.6Sq.m lai a zau a ni, a ti bawk.

Vawiin Scheduled Tribe Girls Hostel hawnna inkhawmah hian Pu Bhupesh Chaudhary IAS, Deputy Commissioner, Siaha leh Pu Joseph L. Chinzah, Asst. Professor, Government Saiha College, Siaha te pawhin thu sawina hun an hmang ve bawk a ni.

Programme kar lakah zaithiam tak tak zaite ngaithlak niin, Pi A.Vanlalzawni, Director, Social Welfare & Tribal Affairs Department chuan lawmthu sawiin he Hostel hawnna hun hi a titawp a ni.