Vawiin chawhma khan Dr K Beichhua, Minister of State for Animal Husbandry & Veterinary department leh Chairman Veterinary, Fishery & Sericulture board ni bawk pisaah board member ten thutkhawm tum thumna an nei a, he board hnuaia hmalak tawhna leh hmachhawpte sawi ho a ni.

Minister Dr K Beichhua chuan Mizoram hmasawnna turin Socio Economic Development Programme kalpui tan a ni a, heng development board hrang hrang zingah hian ei leh bar a kan intodelh theih nan Veterinary, Fishery and Sericulture Board hi a pawimawh hle thu sawiin member te chuan hemi kawnga hmasawnna chak zawk kan ramin a hmuh theih nan thahnemngai tak a he board bultum hre chunga hna thawk turin a chah. Minister chuan he board ina a huam department chhunga mithiam te chu Mizoram hmasawnna turin an theihna leh thiamna te hlawk zawk a hman a nih theih nan theihtawp chhuah a tangkai tak a chhawr thiam turin board member te a chah bawk a ni.

Pu C Lalmuanpuia, MLA, Vice Chairman ni bawk chuan SEDP kaltlanga department thenkhat hmalaknate tarlanna hun a hmang a Pu Lalthangpuia Sailo, Secretary & Commissioner, Animal Husbandry & Veterinary department chuan sawrkar thuchhuak anga SEDP hnuaia mawhphurna inkhaidiat dan leh inrelbawl dan tur te a tarlang bawk.

Vawiin thutkhawm a tarlan danin Fisheries department hnuaiah kum 2019-2020 chhung SEDP kaltlang a project hrang hrang duan Cheng Nuai 5985 hu thehluh tawh a ni a, Crab Farming atan Cheng Nuai 57 leh Fish Seed leh Net subsidized rate a pekchhuah nan Cheng Nuai 100.4 pawm a nih thu sawi a ni. Animal Husbandry & Veterinary department kaltlangin Mizoram State Planning Board, Monitoring & Surveillance Committee chuan district hrang hrang a Vawk leh Ar vulh tihchangtlun nan leh Zokhawthar a Quarantine Camp/Station sak nan Cheng Nuai 1895.28 pawm a nih thu tarlan a ni bawk.