No.2388/2020-2020

Siaha, June ni 24, 2020: Animal Husbandry & Veterinary Minister Dr. K. Beichhua chuan vawiin khan Siaha district, Chhaolo rama AH&Vety Department ranchaw chinna hmun a tlawh bakah Siaha District COVID-19 Food Security Consultative Committee (SDCFSCC) anga hmalakna Chhaolo khawtlang vaimim chinna hmun a tlawh bawk.

Chhaolo khuaa MTP Sub-Headquarters Office-a inkhawmna tawi neihah Dr. K. Beichhua chuan thuchah sawiin, COVID-19 hrileng mekah ram ropui leh thil tithei zawkte nasa taka an buai laiin, Mizoram chhungah he natna vanga nunna chan an la awm lo chu Pathian hruaina a ni, a ti a, lawmawm a tih thu a sawi.

Chhaolo khua leh a chhehvel khua, Siata khua leh Chakhei khua atanga Tipa 'B' thleng huama, Community Mithun Development Project an siam chu a natna hrileng avangin a hlawhtlinna la hmu thei lo mahse, a la hlawhtlin ngei a beisei thu a sawi a, Chhaolo khuaa Rural Animal Health (RAH) Centre sakna tur pawh tihfel tawh a ni, tih a tarlang bawk.

Dr Beichhua chuan COVID 19 donaa thawktu, ZMC-a thawkte, medical staff te leh department dang thawktu zawng zawngte natna kai mai hlauhawma hnathawk an ni a, mahni chhungte pawh hmu tha thei lovin, rim takin hna an thawk a, sawisel aiin kan tawngtaipuina a pawimawh zawk, a ti.

Ei leh bara kan intodelh theih nan taima taka hna thawk tur leh chutiang mite chu sorkar pawhin an thawhrimna a hriatpui thin a ni, a ti a, kan ram politics titi tur chu mahni intodelh tura thawhrim pawimawhzia inzirtirna hi a ni, a ti.

Chhaolo bialtu MDC Pu MH. Tiabi pawhin thuchah sawiin, Chhaolo khaw mipui innghahna chu Sial vulh a ni a, chuvangin Vety Department an mamawhna a sang hle a ni tiin; AH&Vety Minister-in an khua a tlawh chu lawmawm a tih thu a tarlang bawk.

Dr K.Beichhua hi Chhaolo bialtu MDC Pu MH. Tiabi bakah Pu Biakcheuva MDC, official dangte leh party miten an tawiawm a ni.