No.2389/2020-2020

Lunglei District mi leh sa state pawn atanga lo haw, government quarantine facility, community quarantine facility leh home quarantine-a khung hran mek zat chu vawiin chhun dar 12:00 thleng khan mi 354 a ni a. Hengte hi sawrkar Quarantine Centre/DCHC/CCC-ah mi 233, Community Quarantine (kohhran hall) ah mi 100 leh mahni ina inkhunghran (Home Quarantine) mi 21 an ni.

Quarantine period hmang zo tawh, RT-PCR result chhuaka negative bawk te chu Quarantine Centre atanga chhuah phalna pek mek zel niin tun dinhmunah Government Quarantine Facility pali (4) - Eklavya Model Residential School (EMRS), Tlabung Circuit House, Tlabung KGVB Girls’ Hostel, RMSA Girls’ Hostel, Lungsen, leh kohhran hrang hrang CQC paruk (6) -BCM Electric Veng CQC, BCM Lunglawn CQC, BCM Ramthar CQC, BCM Theiriat CQC, PCI Chanmari CQC, PCI College Veng CQC atangin inmates te an chhuak fel tawh a ni.

Lunglei District-ah tun dinhmunah Covid-19 positive mi 47 awm mekin Covid-19 positive te hi Dedicated Covid Health Centre (DCHC), SIRD, Pukpuiah mi pathum (3) leh Covid Care Centre (CCC), LGC Lungleiah mi 44 an ni a. Medical team ten uluk taka vil rengin an zingah dinhmun hlauhthawnawm an awmlo a ni.

Tin, Civil Hospital Lunglei (CHL) Laboratory ah Truenat khawl hmangin swab sample test neih mek zel niin nimin (23/06/2020) khan sample 27 test niin a vai hian a negative vek a. He khawl hman tan 12th June 2020 atanga nimin 23rd June, 2020 thleng khan Sample test tawh zawng zawng hi 159 niin heng zinga sample 157 te chu negative in, sample pahnih (2) positive result hmuhchhuah a ni a. Tuna Truenat Khawl hman mekah hian Covid-19 positive result nemngheh na (confirmatory chip) a awm rihlova. Chuvang chuan positive hmuhchhuahte hi ZMC ah confirm tura thawn phei a ngai a. Tuna positive pahnih hmuhchhuah pawh hi ZMC Laboratory-ah confirm tura thawn phei niin nimin (23/06/2020) ZMC Laboratory in RT-PCR hmanga a test naah sample pakhat hi positive tih nemngheh niin pakhat chu a negative a. RT-PCR result negative hi vawiinah Dedicated Covid Health Centre (DCHC), SIRD, Pukpui atangin discharge tum a ni.