Social Welfare Minister Dr K Beichhua chuan vawiin khan Shastri Bhavan, New Delhi ah Union Minister for Social Justice & Empowerment Thawaarchand Gehlot a hmu a, ruihhlo do leh ruihhlo ngaite enkawl kawnga Mizoram mamawh hrang hrang a thlen.

Ruihhlo ngaite enkawlna hmunpui, Jordan Centre, Sethawn tihchangtlunna zel atan Union Minister Gehlot chuan Cheng vaibelchhe 7.73 pek a nih tur thu leh Drug Demand Reduction atana Mizoram Plan siamte chu pawm vek a nih thu a lo sawi.

Gehlot chuan Drug Demand Reduction atan Fund 25% Mizoram tan pek nghal a nih tur thu Dr Beichhua a lo hrilh bawk.

Mamit, Lawngtlai leh Siaha ah ruihhlo ngaite enkawlna turin Integrated Rehabilitation Centre for Addicts (IRCA) din a pawimawh thu Dr Beichhua in a thlen pawh Gehlot chuan proposal siam turin a lo hrilh nghal. 

Social Welfare Minister Dr Beichhua in Central Jail leh District Jail zawng zawnga ruihhlo ngaite enkawlna tur, Rehabilitation cum Treatment Centre siam vek a duhthu a sawi chu Union Minister Gehlot chuan a tul ang zela puih a inhuam thu a sawi bawk.

Nilaini (8th Jan, 2020) khan Dr Beichhua chuan Union Minister for Textile Smriti Irani leh Union Minister for Fisheries, Animal Husbandry & Dairying Giriraj Singh te a lo hmu tawh bawk.
Dr Beichhua chuan ran vulh leh a sawngbawlna tih thianghlim kawnga Mizoram mamawh hrang hrang te, Giriraj Singh hnenah hian a thlen leh nghal a ni.

Textile Minister Smriti Irani nen an inkawmnaah lian tham leh hlawk zawka pangngang khawi dan project kalpui dan turte an sawidun.

Social Welfare Minister Dr Beichhua hi Ministry hrang hrang dawrin Delhi ah a cham mek a, Social Welfare Department, AH& Vety Department official ten an tawiawm.