No.862/2020-2021

Vawiin chawhma dar 10:00Am khan DC Conference Hall-ah Siaha District Covid-19 Food Security Consultative Committee member te an thu khawm. He SDC-FSCC Committee hi amah Minister Dr.K.Beichhua leh Pu KT.Rokhaw MLA hova April ni 16 a din kha a ni a. Chairman atan Dr.K.Beichhua niin, Vice Chairman atan mi 2 Pu te: KT.Rokhaw,MLA leh N.Zakhai, CEM,MADC an ni a. Member Secretary atan District Bawrhsap Pu Bhupesh Chaudhary, IAS ruat a ni.

SDC-FSCC chuan an din ni tuk April ni 17 atanga Agriculture & Allied Baseline Survey neih nghal a rel angin, Baseline Survey chu zawh tawh a ni a. Vawiin meeting-ah Survey report tawi ngaihthlak a ni.

DAO report: Nikum 2018-2019 khan Siaha district chhung khaw 14-ah Buh chin a ni a,Buh chin nana Lo leh Leilet hman zau zawng hi belhkhawmin Hactare 320 vel a zau a ni. Heta tang hian chawhrualin Buh 1.61MT/Ha tharchhuah a ni. Buh chin nana Leilet thenkhat hman loh leh Ram a awm nual bawk a ni. 2018-2019 khan Thingtlang khaw 50- ah Vaimim chin a ni a.Vaimim chin nana ram hman zau zawng hi 250Ha niin, chawhrualin Hectare khat atangin 1.75MT tharchhuak ang a ni.

DVO report: Tunah hian Siaha district-ah Vawk - 8267
Bawng - 650
Sial - 1204
Lawi - 430
Kel – 1992

Beram - 163 a awm mek a. Chhaolô ramah Sial chaw chinna tura ruahman Hectare 300 a zau-ah pawh Vaimim chin tel ve tura hmalak a ni a. Covid-19 avanga Ei leh Bara harsatna lo thleng thei laka inhmakhuah nan Vaimim hi chin a ni. AH&Vety Office ram Hectare 150 a zauah pawh Vaimim hi ran chaw zingah chin tum a ni bawk.

DFDO report: Siaha district chhungah Sangha Dil 402 a awm a,MGNREGA atangin 228 siam belh a ni bawk. Kum khata tharchhuah zat hi 222.87Qtl a ni.

DHO report: Siaha district-ah hian thlai chi 20 vel tharchhuah a ni a. A langsar zual 10 te leh tharchhuah zat(in quintal) chu:

1) Zikhlum-253
2)Tomato-203
3)Maian-60
4) Mai rah-153
5)Bawkbawn-40
6)Phuihnam-80
7)Hmarcha-25
8)Antam-25
9)Aieng-250
10)Strawberry-46 te an ni.

Horticulture in Ram an hman zau zawng hi 505Ha a ni a, La hman belh theih tur 1185 Ha a awm bawk.

SDC-FSCC thiltum ber chu Covid-19 avanga kan hmalam hun rei lo teah ei leh bara harsatna hmachhawn thei kan nih avanga lo inralrin dan tur leh lo inhmakhuah dan tur ngaihtuaha hmalak a ni a. He inpuahchahna leh ruahhmana hian hun lo la kal zel turah Siaha district-a chhungkaw tin ten kut hnathawh uar a, mahni ke a ding ve theih theuh tura kawng sialsak hi a ni.

Vawiin meeting hi Dr.K.Beichhua’n a kaihruaia, meeting koh chhan sawiin, Covid-19 avang hian tun atanga thla thum(4)/(5) lek-ah Ei leh Bar-ah harsatna tawk theih dinhmunah kan ding a, chung harsatna atang chuan engtin nge kan damkhawchhuah theih ang tih chauh ni lovin, hun lo la kal zel turah pawh engtin nge chhungkaw tin hian ei leh barah kan intodelh anga, engtin nge mahni Ke-a kan din ve theih ang tih hi bengsikin i ngaituah ho te ang u, ti a meeting hi koh a ni, a ti.

Minister chuan tun tum a lo kal hian Vaimim chi 80Qtl a rawn hawn nghal a, hei hi daizai taka sem turin ruahmanna siam nghal a ni. Minister chuan Covid-19 avanga Ei leh Bar harsatna lo hmachhawnna tur concept paper siamin, Project Rs.2500/- lakhs chu State Level Screening Board in an approved hnuah Ministry of Tribal Affairs ah a thehlut tawh bawk a ni.

DC Conference Hall-a meeting an neih zawh hian Minister chuan Circuit House-ah Siaha District Earth Movers Association te kawmin, Ei leh Bar tharchhuak tam tura SDC-FSCC hmalaknaa an JCB hmanga tha an thawh ve theih dan tur te sawipuiin, kar leh atanga hna thawh tan mai thei tura in ring turin a ngen hlawm.

Minister Dr.K. Beichhua hi naktuk zing atangin Siaha diatrict chhunga khaw hrang hrangin Ei leh Bar harsatna lo thleng tur; hmachhawn tura an inpuahchah dan enpui tur leh Ramri a VLTF duty te kan kual turin a fehchhuak dawn a, Pu KT.Rokhaw MLA leh Pu N.Zakhai, CEM,MADC ten an tawiawm dawn a ni.