No.862/2020-2021

Siaha; May ni 6: Social Welfare Minister Dr. K. Beichhua chuan Siaha District Covid-19 Food Security Consultative Committee Chairman a nihna angin Siaha District Earth Movers Association hruaitute meeting a neihpui.

COVID-19 natna hrileng avanga Tam (famine) thleng thei lakah Siaha District mipuite ei leh bar kawnga an lo inbuatsaih lawk theih nan Siaha district khaw hrang hranga leilet awmte chu Food Security Consultative Committee chuan buh chin theih nan ruahman vek a tum a, hemi kawngah hian Earth Movers Association te chu ruahmanna siampui atan meeting a neihpui a ni.

Dr. K. Beichhua chuan Siaha District mipuite chu hrileng karah inthliarhrang thei kan ni lo tiin, tanrual vek a pawimawh thu a sawi.

Committee Vice-Chairman Pu KT. Rokhaw, MLA pawhin Committee thil tum tarlangin Tam tla tur lakah ei leh bara intodelh turin theihtawp chhuaha hmalak an tum thu a sawi a, an hmalakna kawngah thawhpui atan Earth Movers Association te thawhpuiah a sawm nghal.

Committee Vice-Chairman tho CEM, MADC N. Zakhai pawhin mipuite pawh kuthnathawh kawngah an harh tan tawh bakah Green Revolution a thleng chho dawn nia a hriat thu a sawi a, committee hmalakna kawngah MADC angin theihtawp an chhuah tur thu a sawi.