No.861/2020-2021

Lawngtlai, Tomir thla ni 6, 2020: District Child Protection Unit (DCPU), Lawngtlai District te chuan COVID-19 hri leng avanga inkharkhip laia harsatna tawk naupangte tana an inhawn reng thu leh pan theih an nih thu mipui hriata puanzar nan leh he hri leng laka mipui kan him theih nana thawktu zawng zawngte an thlawpzia lantir nan Lawngtlai khawpui chhunga office, bank, petrol pump, hospital, police station/outpost leh veng tina village level task force (VLTF) zawng zawngte hnenah kut tihthianghlimna (hand sanitizer) an sem.

Lawngtlai DCPU chuan inkharkhip laia tanpuitu nei lo naupangte'n harsatna an tawh loh nan leh an chanvo dik tak an hmuh theih nan a zau thei ang berin zirtirna theh darh a tulin an hria a. Hemi atan hian kawng remchang tak ngaihtuah chhuakin, hri leng laka inven nana hmanraw tangkai tak mai hand sanitizer chu a bur pawn lamah naupang puih ngaite tana biak pawh theihna tar langin an sem ta a ni.

"Naupang puih ngai i hmu a nih chuan, District Child Protection Unit Phone No. 9612018408/9612755421/8794880201-ah i be vat dawn nia," tih thu hi he'ng hand sanitizer an semahte hian an bel a ni.

COVID-19 hri leng beih nana hma lakna kawngah hian Lawngtlai DCPU enkawlna hnuaia naupang chhawmdawlna in (home)-a naupangte chuan anmahni them thiamna hmanga card mawi tak tak an siam chu hri leng beihna kawnga ral hma tawnga tang, DLTF, VLTF, Force leh tlawmngai pawlte hnenah lawm thu sawina leh an tha tihchak nan an lo thawn tawh bawk.