Vawiin khan Excise and Narcotics Department Minister Dr.K.Beichhua chuan  Kum 2019-2021 atana MHIP Kumpuan thupui “Tu leh Fate Ruihhlo Laka Venhim leh Chhanchhuak Tura Tan Lak” tih chu Lal Thanhawla Auditorium, Tuikual-ah hawngin, khuallian a ni.

Khuallian Dr.K.Beichhua chuan thu sawiin zu leh ruihhlo dang vangin Mizoram-ah chhungkaw tam takin harsatna an tawng mek a, Sawrkar Department chuan zu leh ruihhlo dona kawngah hma nasa takin la mah se, tlin tawk a nei a thin a, Sawrkar pui tura Mizorama NGO lian pahnih YMA leh MHIP ten ruihhlo do thupui-ah an hmang chu lawm awm a ti a. Minister chuan ruihhlo dona kawng thum a awm a, pakhatna ah chuan dan in a phalloh ruihhlo zawrh leh tawlh ruk leh a chinna hmun tih chhiat (supply reduction) hi a ni, a ti a. Pahnihna ah chuan ruihhlo ti lo tura inzirtirna a ni a, pathumna ah chuan ruihhlo ngai la sim mai thei lo ten natna emaw thil tha lo an tawh lohna tura hmalak a ni, a ti a. Heng ruihhlo dona kawng thum te hi a hlawhtlinna chu lungrual taka thawhhona ah a innghat a ni, tiin a sawi a. Khuallian Dr. K.Beichhua chuan MHIP Kumpuan thupui hi tuna kan tu leh fate tan Nu tan mawhphurhna a sang em em a, ruihhlo do hun diktak chu nu pum chhunga naute a awmlai atangin a ni tih hi MHIP Member zawng zawng ten Zoram pumpuiah hre turin a chah bawk a ni.

He hun hi Kumpuan Sub-Committee Chairman Pi Saipuii’n a kaihruai a; Rev.Lalsangbera chuan Kumpuan thupui zawi zauna a  nei a, Bungkawn Branch MHIP, Sihphir Branch MHIP ten Zaipawl Hla sa in, kalkhawm te an awi a, anni bakah hian mal zai Reiek Block MHIP, Kanan Branch MHIP, Tanhril Vengthar Branch MHIP, Chanmari Branch atangin ngaihthlak a ni a. MHIP General Headquarters President Pi Lalthlamuani pawhin thu sawiin, General Secretary Pi T.Lalthangpuii chuan report tawi a pe bawk a ni.