Vawiin chawhma khan Mizoram Political Science Association (MIPSA) leh Department of Political Science, Government Aizawl College tangkawp chuan ni 17 leh 18 October 2019 chhunga neih tur ICSSR-Sponsored National Seminar on ‘Resurgence of Nationalism: Citizenship, Identity and Belonging’ hawnna hun Conference Hall, Government Aizawl College ah hman a ni a, Pu C Lalramzauva, Adviser to Chief Minister chu khuallian a ni.

Pu C Lalramzauva, Adviser to Chief Minister chuan Nationalism chu pawnlam inrawlhna tellova ramin inrelbawlna tha a neih theih nana hmanraw tangkai tak anih thu sawi a. Mautam vanga mizo mipuiten harsatna an tawh avangin mipuite rilruah Nationalism a piang a, mipuite dinhmun siam that nan leh chawikan a nih theih nan Mizo National Famine Front din alo nih tawh thu a sawi. Khuallian chuan Nationalism avangin mizo thalai tam takin ram leh hnam hmasawn beiseiin hun rei tak hma anlo lak tawh thu sawi a, Peace accord avanga kan ramin hmel thar a chuankai thu te leh Mizo Nationalism Movement avanga hnam anga hmasawn duhna leh rual elna thalaite rilruah a tuh thu a sawi bawk. Pu C Lalramzauva chuan seminar chhimtu mithiam kalkhawmte chu kan ram mila inrelbawlna kalpui dan tur Political philosophy duang chhuak tura rilru leh ngaihtuahna seng peih turin a fuih a, hlawhtling taka seminar kalpui a nih theih nan duhsakna a hlan nghal bawk a ni.

He hunah hian Prof. R.K. Satapathy, Department of Political Science, NEHU & Hononary Director ICSSR – NERC in seminar thupui sawi hawnna neiin, “India ram chu Europe a ram dangte angin hnam in ram a siam lo a, hnam anga kan awm theihna turin sawrkar in min tipumkhat zawk a ni,” a ti a, ram hmasawn tur chuan rilru zau tak leh inunauna tha tak hnuaia inrelbawlna kalpui a pawimawhzia a sawi bawk.

Lalmalsawma Khiangte Secretary MIPSA in lawmthu sawina hun hamngin chawhma hun hi tihtawp a ni. He hunah hian technical session tum 4 nei tur a ruahman a ni a, Indian Institute of Technology (IIT) Guwahati, Tata Institute of Social Sciences (TISS) Guwahati, Aizawl Theological College (ATC), Mizoram University, Academy of Integrated Christian Studies (AICS) leh Mizoram chhunga college hrang hrang atanga mithiam ten paper an present chu zir ho a ni dawn a. Article 370 tih bo tak leh a nghawng te, NRC te, sakhuana leh politics chungchang te, media a thu chhuah in identity a nghawng dan te, Mizo Nationalism than chhoh dan te zir hona neih a ni dawn a ni.

Mizoram Political Science Association (MIPSA) hi kum 2004 ah din a ni a, society registration act hnuaia in register niin Mizoram chhunga politics zirna a tui bik te tan annual membership Rs. 200/- emaw Rs. 1000/- pe in a nih theih reng a tunah hian member 200 an awm mek a ni. MIPSA hian Mizoram chhunga politics zirna lamah mipuite hrilh hriat leh zirtir hi a tum ber a ni a. Tun tuma seminar cum Conference an huaihawt hi a tum sarihna (7) niin Mizoram University hnuaia political science subject zirna bik ah tunlai mamawh ang zela syllabus siam rem tur in hma an la reng a ni.