Vawiin ni 17.10.2019 (Ningani) khan Mizo Upa Pawl, Lunglei atanga lo kal member 23 te chuan Mizoram Science Centre, Berawtlang-ah Exposure Tour Programme an hmang a. Dr. R.K. Lallianthanga, Chief Scientific Officer, Directorate of Science & Technology chuan he Exposure Tour Programme hawnna Mizoram Science Centre Auditorium-a neih chu a hmanpui a ni.
Dr. R.K. Lallianthanga, Chief Scientific Officer, Directorate of Science & Technology chuan thusawiin, Mizote nunah tunlai khawvel science leh technology thiamnain a hrinchhuah hmanraw chi hrang hrang ten hmun pawimawh tak an luah tawh a, kan nitin hnathawhna leh khawsaknaah hian science thiamna hmang tangkaiin hmasawnna tam tak kan lo nei ve tawh a ni a ti a. Mizoram Science Centre-ah hian science zirna pui thei tur hmanrua mawlmang leh hriatthiam awlsam te te bakah tunlai khawl changkang hmanga vansang chanchin zir theihna te a awm thu a sawi a. District danga a hmasa ber ni turin tunah hian Zohnuai, Lunglei-ah Lunglei Science Centre din turin hma thui tak lak anih tawh thu a tarlang bawk.
He Exposure Tour Programme hi Pu Renthlei Hnuna, Curator chuan kaihruaiin, Mizo Upa Pawl, Lunglei ten sawm an nih anga Mizoram Science Centre tlawhna hun tha tak an rawn hman theih avangin a lawm thu a sawi a. Mizoram Science Centre a science exhibit chi hrang hrang awm te, Innovation Hub leh Space Education Centre te rawn hmuhpui a hun hlimawm tak an hman theih nan duhsakna a hlan a. He Centre hi zirlaite mai bakah mipui mimir tan kartluanin tlawh theih a nih thu sawiin, a tlawhtu te tana awlsam te a science hriatthiam theihna hmanraw tha leh changkang tak tak te a awm thu a sawilang bawk.
He Exposure Tour Programme hawnna hunah hian Pi Lalrinnungi, Education Assistant chuan Science Centre hnathawh dan kalphung leh science exhibit chi hrang hrang awmte a sawifiah a. Pu, K.T. Chhawna, Vice President, MUP Lunglei chuan memberte aiawhin lawmthu sawina hun a hmang a. MUP memberte tan hian nilengin indoor leh outdoor exhibit te an en a, 3D-Show leh, Planetarium Show te thlir hovin Innovation Hub te an fang bawk. Tin, Mizoram Science Centre Auditorium-ah sawihona leh inkawmhona hun an hmang zui bawk a ni.
