HIV/AIDS laka in venna tur leh a do let dan tur ngaituahtu Kolasib District Aids Prevention and Control Committee member te chu vawiin khan Kolasib DC Conference Hall ah Chairman Pu Zoengsanga kaihhruaina hnuaiah an thukhawm.

Chairman Pu Zoengsanga chuan HIV/AIDS in Mizoram a run nasat thu tarlangin mi tam takin nunna an chan phah tawh a, heng natna thlentu syringe thianghlimlo hmanga damdawi inchiu, mipat hmeichhiatna hmansual chungchang te hi zau thei ang bera mipui hnena zirtirna pek a pawimawh thu a sawi a, Hnam tlemte Mizo te min run tu HIV/AIDS chu tih takzeta do let turin hmalak a pawimawh hle ani a ti. 

Thutkhawmah hian hun hmasa lama HIV/AIDS laka hmalakna hrang hrang thlirho ani a, Report atanga a lan dan in June 2002 atanga September 2019 thleng khan Kolasib District ah mi 65,286 thisen test tawh ani a chung zinga mi 1299 chu HIV Positive tih hmuchhuah an ni. Mi 65,286 zingah hian mi 37,338 chu General Client niin 27,948 chu nu nau pai (pregnant women) an ni. General Client 37,338 thisen test zingah mi 1177 (3.2%) an positive a, Nu nau pai 27,948 thisen test zingah mi 122  (0.5%) an positive a, heng damlo te hi counseling bakah treatment pek an ni tih tarlan bawk a ni.

HIV/AIDS natna thlentu chungchanga inzirtirna bakah kawng hrang hranga hmalakna tur te rawt(chhuah) ani a, Department hrang hrangte nena thawhho dan tur te ngaituah niin HIV/AIDS chungchanga hmalakpui turin Kolasib khawpui chhunga Kohhran hrang hrangte hnenah ngenna siam nise ti a rel bawk ani.