604/2026-2027

Aizawl; the 19th may,2026: Vawiin khan Dr. K.C. Lalmalsawmzauva, Adviser to Chief Minister chuan Tuirial Secondary Collection Centre(SCC) atanga kumin chhunga sawhthing hralhchhuah hnuhnung ber phur a vai liam hnuah, handholding Scheme hnuaia Sawhthing processing plant, Sairang atangin  a  vawikhatna tur leh a hmasa ber atan sawhthing  sawngbawl sa ( Slice dried Ginger) 5MT phur Lirthei a vai liam leh bawk.

Tuirial SCC atanga kumin atana sawhthing thawnchhuah hnuhnung ber tur phur Lirthei a vai liamna programme tawiah hian thu sawiin; Adviser to C.M. Pu KC Lalmalsawmzauva  chuan Tuirial SCC enkawl tu ten hetiang programme buatsaihna chang an hria chu lawmawm a tih thu leh engmah harsatna leh buaina awm lova Tuirial SCC atanga Sawhthing hralhchhuah hnuhnung ber phur lirthei vai liam thei a nih hian, Tuirial SCC buaipuitute thawhrimna leh inpekna nasat zia a lang a,  Tuirial SCC viltu Society hruaitu te, a bik takin Official te an pocketa lut ve tur nilo, kuthnathawktu te hmangaih vang leh sawrkar programme a nih avanga rinawm leh taima taka an mawhphurhna an hlen chu ropui a ti thu a sawi.

Sawhthing man man zawk leh mumal taka hralh a nih theih nan hian Primary Collection Centre (PCC), Secondary Collection Centre (SCC), Mizoram Agricultural Marketing Board (MAMB) leh District Agricultural Marketing Committee (DAMC) te hi inbe pawp rengin, an thawhho thatna leh inpekna vang liau liau a tun dinhmun thleng thei an ni tih sawiin, rinawm tak leh tha taka an hna an hlen theuh thei  chu lawmawm a tih thu a sawi  bawk.

Pu KC-a chuan Sawhthing market kan kalpui mekah hian mawlmang  taka thil kalpui kan tum lo a, Research-based a kalpui kan nih avangin tum mumal tak nen year-wise target neiin hma kan la mek a , chung kan hmachhawp te chu:-First Phase (2024-2025): Bul tan kum leh insiamrem kum (Year of system formation) ah kan puang a. Second Phase (2026-2027): A sawngbawlna uar kum  (Year of Processing & Value addition) ah kan puang a. Third Phase (2027-2028): Hmun ngheta chin leh Organic uar zawka kalpui (Year of Sustainable Cultivation and Organic/Natural Farming) kumah kan puang a ni, tiin an hmalak dan tur leh hmachhawp te sawifiahna hun a hmang a. Mizoram a kan sawhthing thar in hmun hla tak tak a thleng ta chu lawmawm a tih thu sawiin, kalkhawm te zingah sawhthing sawngbawl dan tura ngaihdan tha zawk nei te an awm anih chuan sawrkar hnena thurawn pe hreh lo turin a chah nghal bawk a ni.

Pu Lalhmingmuana, Managing Director, MAMB in  kumina sawhthing lei leh hralh tawh dan report pe in, Mizoram chhungah sawhthing quintal 82972.10 chu support price pek tawh anih thu sawiin, hemi atan hian pawisa  ₹22,25,78,995 pek chhuah tawh anih thu a tarlang a,  Sawrkarin thlai thar doletna tur support price atan a  dah vaibelchhe ₹150  atangin vaibelchhe ₹40 vel chauh hman a nih thu sawiin, sawrkar sum tam tak hum ani chu lawmawm a tih thu a tarlang bawk a ni.

Tuirial SCC  hnuaiah hian PCC 9 awmin, Tuirial SCC atang hian sawhthing  1,42,902.9Kg  hralhchhuah niin, ₹ 25/Kg in 22559.2Kg, ₹22/Kg in 62,704 Kg , ₹40/Kg in 17,604 leh ₹ 50.50 in 40035.7Kg te hralhchhuah a ni. Sawrkarin  sawhthing 1,42,902.9Kg  a do let nana sum sen zat chu ₹34,75,899.2 a ni.

Adviser to C.M. Pu KC Lalmalsawmzauva  hian  Turial SCC atanga sawhthing hralhchhuah hnuhnung ber phurtu Lirthei a vai liam zawh hnu hian  kumin January thlaa Chief Minister in a hawn  tak Sairanga sawhthing processing plant-a   Good Faith Company in an sawhthing sawngbawl hmasak ber (slice dried ginger) 5MT chu a vailiam leh nghal a ni.

Slice Dried Ginger vai liamna programme tawiah hian thu sawiin Pu KC Lalmalsawmzauva chuan Handholding hnuaia processing unit atanga thla 4 chhung leka an product hmasa ber 5 MT vai liam theih a ni chu thil chhinchhiah tlak tak a ni  tiin, an thawpui  Good Faith leh Slice Dried Ginger leitu company  Nature Sampann te bakah a processing khawihtu entrepreneur te chungah lawmthu a sawi bawk.  Vawiin ni thleng tura an in dawrna zawng zawng leh hma an lakna, experience te chu midang share ve turin a chah a.

Pu KC-a chuan a process-ah hmabak an la ngah thu leh fimkhur ngai lai tam tak a la awm thu te, FSSAI registration leh chemical test te paltlang a ngai thu te leh a phur nazawng tih chi a niloa, mi duhtui, ti tak tak leh thalai lehkha thiam te tih chi a ni thu a sawi a. Mizo thalai lehkha thiamte lo pen chhuak a, sawhthing chauh nilo vegetable processing lama uar zawka hma la turin a sawm bawk a ni.