603/2026-2027

Dated Khawzawl, the 19th May 2026 : Vawiin khan District Development Coordination & Monitoring Committee (DISHA) meeting chu Mizoram Lok Sabha MP Pu Richard Vanlalhmangaiha, DISHA Chairman hov in DC Conference Hall-ah neih a ni a, he hun hi Khawzawl Bawrhsap Pu K. Vanlalthiana, DISHA Member Secretary ni bawk chuan a kaihruai.

Vawiin thutkhawmah hian Lok Sabha MP Pu Richard Vanlalhmangaiha chuan thu sawiin, mipuite hmasawn nana Sawrkar laipui scheme pawimawh tak tak duante kalpui a nih dan leh an hnathawte inhriatpui tawn nan DISHA meeting hi neih thin a ni, a ti a. District hmasawnna tur ngaihtuah turin he meeting-a kalkhawmte hian mawhphurhna lian tan an nei tih sawiin, district tan thahnemngai taka thawk zel turin a chah a. Department hrang hrang hotute inhmuhkhawm a har thin avangin vawiin meeting hi hmang tangkaia an hnathawhte inhriatpuia, thawhho theihna laite pawh ngaihtuaha sawiho turin a fuih bawk a. Department hrang hrang hnathawh leh hmalaknate chu tha a tih thu sawiin, district tana an inpekna avangin lawmthu a sawi.

Vawiin thutkhawmah hian SDO Pu Chandrakant Bagoria hnen atangin Sawrkar laipui Scheme hrang hrang hmalaknate ngaihthlak a ni a. Head of Office-ten an department theuh hmalaknate sawifiahin, zawhna awmte an chhang a, hmachhawp an neihte leh harsatna an neihte sawiho nghal a ni a. MP Pu Richard Vanlalhmangaiha chuan an harsatnate sawrkar laipui hotute hnenah a thlensak tur thu sawiin, Scheme hrang hrang hnuaia hamthatna dawngtu turte (beneficiary) uluk taka thlang turin a fuih a. DISHA meeting hnuhnung bera an thu relte bawhzuina dinhmun thlirho a ni bawk.

DISHA hi district hrang hranga sawrkar laipui scheme hmalakna viltu Committee a nih bakah Department hrang hrangte inkara thawhho dan tur ngaihtuah leh thawhhona tha siam tura din a ni a. Vawiinah hian Department hrang hrang Rural development, Education, Agiculture, Horticulture, Social Welfare, Health & Family Welfare, Lead District Manager, DUDO, Commerce & Industries, PHE, PWD, DCSO, CDPO leh VC hruaitute an tel a ni.