No.711/2021-2022

Aizawl, the 28th May, 2021 : Vawiin khan Dr Lal PathLabs, Bazar Bungkawn, Aizawl chuan COVID-19 hripui leng dona hmanraw pawimawh tak Personal Protective Equipment (PPE) full set 3000 Rs. 28,50,000/- man hu Mizoram sawrkar hnenah an hlan a. Heng PPE hi Health Minister Dr. R. Lalthangliana hnenah Dr Lal PathLabs aiawhin Nathan T. Lalchhanchhuaha, Lab Administrator leh Tv C. Lalramtiammawia, Territorial Manager ten Health Minister pisa-ah an hlan a ni.

Health Minister Dr. R. Lalthangliana chuan COVID-19 hri leng dona kawngah mamawh chi hrang hrang tam tak a awm a, chung zinga chuan sample test kit leh PPE te hi kan mamawh zual bik, a tel lova kan awm theih miah loh a ni a. PPE kit phei hi chu ZMC ah ringawt pawh nitin 200 chuang kan hmang a, frontline workers sample la tu, laboratory leh COVID-19 positive enkawlna hmuna thawkte leh mi dang dangin an hman nen chhut phei chuan nitin 500 bawr vel hmang ang kan ni a, a leina tur pawh nei ni ila, ramchhung kiltin atangin mamawhna a san avangin lei tur chan a har a, kan duh hun hunah kan chah thleng thei lova, kan mamawh zual lai tak maia Dr Lal PathLabs ten 3000 lai min rawn pe hi thinlung takin lawmthu ka sawi a ni, a ti a. Dr Lal PathLabs ten mamawhtu mipuite rawng an bawlsak zelna turah duhsakna a hlan nghal a ni.

Health Minister chuan tunhnaiah positive kan tam avang leh sample test ngai an tam chak em avangin sample test kit pawh a hek hle mai a, trueNAT laboratory a kan hman tur pawh a khawl siamtu Molbio Diagnostics Pvt. Ltd., Goa ami te siam test kit lo chu hman theih a ni lova, Rs vaibelchhe 1 chuang man kan order tawh sa pawh ram pumah thlawhtheihna service a mumal loh avangin niminah a rawn thleng thei chauh a, vawiin lamah district hrang hrang mamawh turte kan sem chhuak nghal a ni, a ti a. Ventilator tha chi 35 kan order zingah 25 chuan nimin khan Kolkata rawn thleng tawhin, a siamtu company engineer ten an remkhawm mek a, Wing Commander J. Lalhmingliana’n ka ngenna ngai pawimawhin theihtawp min chhuahsak a, rokhawlhna a awm loh chuan karleh thawhlehni hian a rawn thlen theih kan beisei a ni, a ti a. Ventilator pakhat man hi Rs. Nuai 13 vel a nih thu a sawi.

Dr R. Lalthangliana chuan COVID-19 dona kawngah ram pawn hmun hrang hrang atangin tanpuina kan dawng reng a, vawiinah pawh Singapore atanga oxygen cylinder Type-B (10 litres) 50 kan dawn chuan Mizoram a rawn thleng a, tunah hian Kuwait atanga kan dawn Jumbo cylinder (40 litres) thunkhah sa 180 lai mai chu Guwahati atang motor liana rawn phurh mek a ni, a ti bawk. Mipuite chu inveng fimkhur tura chah nawn lehin sawrkarin an sahimna tura ruahmanna a siamte zawm tha hram hram turin a ngen a, mahni hriselna inchik reng turin leh inrinhlelhna an neih chuan daktawrte a rang thei ang bera rawn thin turin a chah a ni.

Vawiina Dr Lal PathLabs-in PPE set 3000 hlan hi full set niin face mask, face shield, mit venna goggles, hand gloves, pheikhawk tuamna, lu tuamna, suit leh a paihna tur (bag) a chhawm a, set khat hi Rs. 950/- man a ni.