4150/2024-2025

Lawngtlai, 10th February 2025 : Lawngtlai District Level Committee on Fire Prevention bultumin vawiin chawhma dar 11:30 khan 'Fire Prevention Week 2025' hawnna inkhawm chu  DC Conference Hall-ah neih a ni a. He hun hi Pi Margaret J. Vanlalremmawii, SDO (S) chuan kaihruaiin, Dr.Lorrain Lalpekliana Chinzah, Adviser to Chief Minister chuan khuallian niin a hmanpui.

Dr. Lorrain Lalpekliana Chinzah chuan kalkhawmte hnena lawmthu sawina nei hmasain, Pi leh Pute atanga Lo nei mi kan nih angin, kangmei hian kan nunah nghawng tam tak a lo nei tawh thin avangin, ngaihpawimawh pawh tul hle a ni, a ti a. Ram kang hian thing leh mau bakah ramsa leh nungchate chenna a tichereu a, leilungin a hânna hlauhin, tui hna nasa taka tihkiamin a awm thin a, a tuartu zingah mihringte pawh an tel thin a ni, a ti. Adviser to Chief Minister chuan Mizorama ramkang tam zawk hi mihringte vanga chhuak a ni tih tarlangin, hei hian fimkhur a tul zia a tilang chiang hle a ti.

Adviser to Chief Minister chuan Forest Survey of India 2021, report danin Mizorama Forest Cover chu 84.5 % ni mêk mah se, ramngaw tihchereu dan chhutin,  theihtawp chhuaha ramngaw venhimna kawnga tan tak a tul hle a ti. Kum tinin khua a lum zel a, sik leh sa nasa takin a inthlak danglam a, Global warming leh Climate change hian khawvel a tibuai tak zet tih sawiin MLA chuan ramngaw humhalh kawngah theihtawp i chhuah tlang ang u tiin a sawm a.  Dr. Lorrain Lalpekliana Chinzah chuan Mizorama ramngaw tamzawk chu awlsam taka kangmei chhuahtheihna a awm a ni tih tarlangin, hetiang dinhmuna awm mek a nih lai hian ram luahtu mipuite chu ngaihthah mai lova, thahnem ngai  taka ramngaw leh nungchate humhalh turin a chah. 

Sawrkarin kangmaei laka invenna tura theihtawp a chhuah thu tarlangin, Dr. Lorrain Lalpekliana Chinzah chuan kum 2000 khan sawrkar hnuaiah, State Level Fire Prevention Committee, District Level Fire Prevention Committee leh Village Level Fire Prevention Committee-te  din a lo ni tawh a, LADC huamchhunga  khaw hrang hrangah pawh din mek zel a ni, a ti. Fire Prevention Week - hman chhunga kangmei laka fihlim tura kawng hrang hranga inzirtirna (Awareness) kalpui thin chu thil hlawkthlak tak a nih thu sawiin, MLA chuan a taka nunpui theuh turin mipuite a ngen a. Khuallian  chuan Mizoram leh a chhunga awm- ramngaw, thing leh mau, nungchate chu ram rohlu an nihna hriatchian a pawimawh hle  tih sawiin, theihtawpa venhim chu mitinte mawhphurhna a nih thu a sawi a. Dr. Lorrain Lalpekliana Chinzah chuan Mizoram chu thangtharte tana chhenfakawm, luah tlaka siam tur  leh ramngaw tichereu theitu laka venhim kawnga theihtawp chhuahpui turin  NGO, VC, Kohhran leh Lawngtlai mipuite a sawm nghal bawk.

Pu Albert Lalrinzuala, Sr. ACF, LADC chuan Fire Prevention Week puala kum hmasa lama hmalakna hrang hrang tarlanna neiin, Fire Prevention Week -2025 thu intiamkamna (pledge) sawihona a kaihruai a. Fire Prevention Week hi kum tinin thupui thlan bik nei a hman thin a ni a, Kumin thupui atan 'Kangmei ven hi kan tu leh fate hmakhua tan a ni'  tih thlan a ni a. Lawngtlaiah chuan February ni 10- 15 chhung hman a ni ang.

Vawiin 'Fire Prevention Week 2025' hawnna inkhawmah hian sawrkar department, NGO, VC leh Kohhran aiawhte an tel kim tha hle a, Pu Elvis Lalthangzuala, President, MJA, Lawngtlai District chuan lawmthu sawina neiin hun a khar.