2451/2026-2027

Lawngtlai, 30th September 2026: Vawiin khan Dr. Lorrain Lalpekliana Chinzah, Adviser to Chief Minister (H&FW, A&FW) leh Lawngtlai East bialtu MLA nibawk chuan Lungtian MDC Constituency - khawtlang tan a MLA Fund atangin Ambulance pakhat a hlan. Lawngtlai Bawrhsap Pu Donny Lalruatsanga chuan tawiawmin khawtlang hruaituten an lo dawngsawng a ni. 

Dr. Lorrain Lalpekliana Chinzah chuan Lungtian khawtlang mipuiten an lo dawnsawnnaah lawmthu sasiin, Lungtian MDC Constituency khawtlang mipuiten tangkai taka an hman tura lawm taka a hlan thu a sawi a. Dam loh nikhua leh Emergency - ah mi harsa leh chanhai  zawkten an chhawr dawn hle a, nunna hlu tak  chhan nan pawh a tangkai dawn em em a ni, a ti. Kawng hrang hranga MLA Fund hman thinah Ambulance leina tura hman chu mimal tak pawha  tha a tih thu sawi a ni. MLA chuan Ambulance enkawl kawngah pawh khawtlang mipuiten neitu thinlung neih  a pawimawh hle a, hmangaih leh duat taka enkawl turin a chah a ni. 

Adviser to Chief Minister chuan Lawngtlai District- hmasawnna turin District Administration nen lungrual taka thawhho a nih thu sawiin, chak zawka hmalak chhunzawm zel a ni ang a ti a.Tuichhak tlangdung  khuaten  mamawh an neih hrang hrangte theih ang anga bawhzui thin a ni a,  hmalak chhunzawm zel a ni ang a ti.  A bik   takin kum tawpa  Lungtianin LIKBKTP Inkhawmpui an dawl turah Street Light, Kawngpui siamthat leh tul dangte thawh a nih tur thu a sawi bawk a ni. 

Pu Donny Lalruatsanga chuan Lungtian MDC Constituency - khawtlangin MLA kaltlanga Ambulance tha tak an dawng chu mimal taka a lawmpui thu a sawi a. MLA Fund - hmannaah chuan a tangkai ber pawl nia anhriat thu sawiin, khawtlang mipuite tangkai taka hmang turin a chah a. Ruihhlo do, Faina leh thianghlimna kawngah District Administration leh LADC - in theihtawp a chhuah mek tih sawiin, a theih ang anga sawrkar lo tawiawm turin khawtlang mipuite a sawm nghal bawk. 

Lungtian -I VCP, Pu R.B. Chunga  chuan khawtlang aiawha lawmthu sawina a nei a. Lungtian khawtlang mamawhna hriaa Adviser to Chief Minister - in Ambulance a hlan chu thinlung taka lawmawm tiin, khawtlang hmingin a  chungah  sawi a. Ambulance enkawl kawngah khawtlang mipuiten theihtawp an chhuah tur thu sawiin, khawtlangin mamawh dang an neihah pawh ngaihtuapui turin MLA leh Bawrhsap chu a ngen nghal a ni. 

Lungtian MDC Constituency - ah hian Lungtian I, Lungtian II, Vartek leh Vartekkai te an awm a ni.