2066/2024-2025

Dated Lawngtlai, 13th September 2024 : Vawiin khan Dr. Lorrain Lalpekliana Chinzah, Adviser to Chief Minister leh Lawngtlai East bialtu MLA nibawk chuan District Project Office, Samagra Shiksha, Lawngtlai a tlawh a. Pu Lalchhanhima Chhangte, DPC leh thawktu dangten MLA hi an lo dawngsawng a ni.

Dr. Lorrain Lalpekliana Chinzah chuan DPC leh thawktu dangte hnena lawmthu sawina a nei hmasa a. District Project Office-  chu Lawngtlai district-in zirna lama hma a sawn theihna tura Office pawimawh ber a ni tih hriaa, thawktute pawh thahnem ngai taka thawk thin turin a chah a. Rinawmna pawimawh zia sawiin MLA chuan eng hna pawh thawk ila rinawm taka thawh a nih chuan malsawmna a keng tel thin tiin, rinawmna leh taihmakna nena an hna thawk thin turin a fuih a. Lungrualna tel lo chuan hnathawhin awmzia a nei lo fo tih sawiin lungrual tak leh induhsak tawnna nena thawk turin a chah.

Ai kal chungchang sawiin Dr. Lorrain Lalpekliana Chinzah chuan sawrkarin ai kal titawp turin theih tawp a chhuah mek a ni tiin hei hian ram leh hnam tana nghawng tha zawk a thlen ngei a  beisei awm, a ti. Zirna in hmasawnna a neih theih nana sawrkar hmalakna hrang hrangte tha taka lo bawhzui zel turin District Projet Office-a thawk zawng zawngte a chah a. Literacy Rate- ah Lawngtlai district- a hnufual thin hle chu veiawm a tih thu tarlangin Adviser to Chief Minister chuan zirthiamna kawnga theihtawp lo chhuah chhunzawm zel tur leh a tul anga hma la thin turin  District Project Coordinator leh a thawhpuite a sawm nghal a ni.

Dr. Lorrain Lalpekliana Chinzah, Adviser to Chief Minister hian Government Southern Standard Middle School leh Government College Veng High School, Lawngtlai a tlawh nghal a. Vawiina zirlaite hi nakin lawka ram leh hnam hruaitu tur an nih avangin anmahni chher hriama thiamna petu Zirtirtute an pawimawh hle a ni, a ti a. Zirtirtute chu sawrkar kut leh ke pawimawh tak an nihna hre reng tura chahin, hlawh hmuh nan chauha hna thawk lo tur leh ram leh hnamin a mamawhna hre reng chunga thawk zawk turin a fuih a. School - in harsatna leh mamawh hrang hrang an neih kawngah theihtawp chhuah a tum thu sawiin, sawarkar pawhin an mamawhte a pek thuai a beisei tih a tarlang a. Dr. Lorrain Lalpekliana Chinzah chuan  vawi leh khatah engkim in pek vek theih a nih loh pawhin a tahtawl a hmalakpui a tum thu a sawi bawk.