1191/2026-2027

Lawngtlai, 25th June 2026 : Vawiin khan Dr. Lorrain Lalpekliana Chinzah Adviser to Chief Minister ( H&FW, A& FW) leh Lawngtlai East bialtu MLA nibawk chuan District Hospital Lawngtlaia ' Trauma Care Facility ' chu a hawng a. Lawngtlai District- bawrhsap Pu Donny Lalruatsanga chuan a hmanpui.

Dr. Lorrain Lalpekliana Chinzah chuan a mamawhtu ten tangkai leh hlawk taka an hman tura lawm taka 'Trauma Care Facility' a hawn thu a sawi a. Trauma Care Facility - hawn a nih theihna turah Chief Minister leh Health Minister - ten theihtawp an chhuah tih tarlangin, an chungah lawmthu a sawi a. Lawngtlai District- in hriselna kawngah rahbi thar a kai zel chu mimal taka lawmawm a tih thu a tarlangin damlo te bakah Doctor leh thawktuten an hmangtangkai dawn hle tih sawiin, heihian damlo enkawl kawngah nasa takin hmasawnna a thlen dawn a ni, ti. District Hospital - pan tute chu mi rethei leh chanhai zawkte an nih fo thin avangin, duat leh hmangaih taka lo dawnsawng leh enkawl a pawimawh hle tiin, hemi kawnga tan la thar turin thawktute fuih a ni.

Adviser to Chief Minister chuan thawktute indaihlohna a hriatthiampui tih sawiin, hemi kawngah hian chak taka hmalak mek zel a ni, a ti a. District Hospital - mamawh tam tak zingah 'MLA Fund' atanga Nurse pakhat leh Group D- pakhat chhawr a nih tur thu a sawi a. Hriselna kawnga Lawngtlai District- hmasawnna turin tihtur tam tak a awm tih hriat a tul a, vawikhatah tih vek theih ni lo mahse a tahtawl zelin hmalak a tul tiin, MLA chuan District Hospital - a thawkte thahnem ngai taka thawk zel turin a chah nghal bawk.

Bawrhsap Pu Donny Lalruatsanga chuan 'Trauma Care Facility' hawn a ni chu lawmawm a tih thu sawiin, Lawngtlai District tan hmasawnna thar a ni, a ti a. A building tihchangtlun leh zelna turah District Administration - in theihtawp a chhuah zel tur thu a tarlang a. Thawktuten hnehsawh taka vil a pawimawh dawn hle tih tarlangin, mipuite rawngbawltu an nihna hriaa, theihtawp chhuah zel turin a chah a ni.

Vawiin hun hmanna hi Dr. Paul Lalchungnunga I/C Medical Superintendent chuan kaihruaiin,thawktute an telkim tha hle a. Medical Superintendent - chuan lawmthu sawiin hun a khar.