No.6444/2020-2021

Dr. Pachuau Lalmalsawma, Official Spokesperson & State Nodal Officer on COVID-19 chuan Aizawl Municipal Area Lockdown neih chhungin COVID-19 hri kai hmuhchhuah leh anmahni kaihhnawih contact tracing hna thawh chak taka kalpui a nih thu a sawi.

Dr. Pachuau Lalmalsawma chuan Lockdown puan hma kar chho ah khan AMC area a Local Council 83 zinga 45 ah COVID-19 positive hmuhchhuah a nih thu leh positive hmuhchhuah zinga 80% chu natna langchhuak (symptom nei) an ni tih sawiin, positive hmuhchhuah tawh zawng zawng zinga 93% chu tualchhung mi, civilian an tih a sawi a. zirna in leh kum upa lam positive an tam tak em avangin leh damlo serious tak tak an tam tak avangin hri inkaidarh zel tur rang taka ven a ngai a, sawrkar pawhin lockdown puan hi a hreh em em a, kan dinhmunin a zir si loh avangin zau taka inrawn tul a ti a, kohhran hruaitute, NGO hruaitute, Indian Medical Association hruaitute leh department hrang hrang hotute rawnin uluk takin an sawiho hnu ah nunna chhan hia pawimawh hmasa ber a ni tih pawmin lockdown kan puang ta a ni, a ti a. Hemi chhung hian aCOVID-19 hri kai a tam thei ang ber hmuhchhuah tumin tan lak a nih thu leh Contact tracing leh sample lak hna pawh chak taka thawh a nih thun a sawi a. Kawng tinrengin TV, Radio leh social media kaltlangin mipuite zirtirna leh kan dinhmun hrilhfiahna te neiin tan kan la bawk a ni a ti.

Lockdown puan kar, kar kalta chhung khan sample 9781 test a nih thu sawiin, AMC area-a Local Council 54 ah positive an hmuhchhuah thu a sawi a. Positive hmuhchhuah zinga 77% mipa an nih thu leh, hei hian mipate a vakchhuak tam zawk kan nih avanga kan fimkhur a tul thu sawiin, positive zinga tam tak hi dawr ngahktute leh anmahni atanga kai an nih avangin bazar kal leh dawra thil leina ah fimkhur takzet turin mipuite a ngen a. Zaipawl hla zirna hmun atanga hri inkaichhawng mi 18 an awm tawh a, Office kaihhnawihah mi 45 awmin damdawi in leh a chheh velah mi 48 an awm tawh thu a sawi. hei bakah hian Mizoram pawna zinchhuah ngai in test zingah kai inring lo positive si an hmuhchhuah nual tawh thu sawiin, hri kaina chhui harsa an pun zel avangin contact tracing team te pawh thuam chak an ni, a ti.

Sawrkarin AMC area inkharkhip a pawhsei chhung hian theihtawpin hma an la tih sawiin, mitin chu mahni in chik a, symptom nei nia inhria emaw, mahni inringhlelte chu rang taka Mizoram COVID-19 Helpline no. 102(toll free), 0389 2323336, 0389 2318336 – ah in report thin turin a ngen a, positive contact nei nia inhriate pawh contact tracing team in an biakpawh nghak kher lova, mahni inreport vat tura ngen in, hetianga kan tih chuan keimahni mai bakah midang tam tak hri kaina lak atang kan veng thei dawn a ni, a ti a. Tumah chi-ai lova, rilru fim tak nen, fimkhur taka hri kai lo tura inveng turin a chah a, sawrkar thu leh hla ngaichang a, thuawih taka zawm hram hram turin a ngen bawk a ni.