Vawiin khan Dr. R. Lalthangliana, Health & Family Welfare, Higher & Technical Education, Commerce & Industries Department changtu Minister chuan Mamit khua tlawhin a Department chan hmunhma te a hmun ngeiah kalin a tlawh.

Minister hian Mamit District Hospital dinhmun chu mipui hriselna nena inkungkaihna ngaipawimawh damdawiin a ni tih a lang a. Thawktute pawh invawng tha a, hmangaihna leh dawhtheihna nen chhel taka damlote enkawl turin a chah a. Hospital changtlung tak, vaibelchhe 38 District Civil Hospital sakna tur Ministry of Minorities Affairs, Govt. of India hnuaia Project kal mek chu chak taka bawhzui a nih dawn thu a sawi. Khawl enkawltu tur tul bik zual Technician, Hnimhlum thiam Doctor Specialist, Pathologist/Microbilogist Mamit District Hospital-in a mamawh em em chu a hmalama kan neih theihna turin hmalak a nih tur thu a sawi.

Sorkar Programme Social Economic Development Programme (SEDP) hnuaiah mipui hriselna chu ngaihpawimawh berte zing ami anih dawn thu sawiin natna laka invenna lamah te, tihdamna lamah leh khawl leh mihringte tihchangtlunna kawngah nasa zawka hmalak zel tum a ni a ti a. Medical Staff-te chu faina leh thianghlimna chu culture-ah siamin, thawhhona tha tak nena mipui rawngbawl turin a chah a ni.

Vawiin vek hian Government Mamit College tlawhin College Principal leh Staff-te nen inkawmhona tha tak neih a ni a. Mamit College-ah Arts Stream-a Subject hrang hrang zirna a awm kim lo chu Mamit mipuite tan harsatna lian tak a nih angin a tul anga hmalak chhoh a nih dawn thu a sawi. College Principal-in an harsatna a lo thlen hrang hrangte pawh a tul anga hmalak a nih dawn thu a sawi bawk.

Minister hian vawiin vek hian District Industries Centre, Mamit chu a hmunah a tlawh a, Sub Divisional Industries Officer,  (SDIO) Mamit chuan an harsatna hrang hrangte Minister hnenah hian lo thlenin bawhzui dan turte sawiho nghal a ni.

Vawiin vek hian Kawrthah CHC leh Zawlnuam PHC te chu Minister hian a tlawh bawk.

Minister hi Mamit District Bawrhsap,  Director, Health Department, Higher & Technical leh Commerce & Industries-a Jt. Director-te bakah Mamit khawpui chhunga Department hrang hrang hotute'n an tawiawm a ni.