Vawiin chawhnu khan Information & Public Relations Minister Pu Lalruatkima chuan I&PR  Department-a thawk zawng zawngte leh MJA member-te, Kumthar 2019 atana Inhlan Tharna Hun, I&PR Auditorium-ah a hmanpui a ni. Inhlan Tharna Hun hi I&PR Director Pu David L.Thangliana chuan a kaihruai a, Deputy Director Pi P.B Lianthangpuii chuan Bible Chhiarna leh Tawngtaina hun a hmang a ni.

Information & Public Relations Minster Pu Lalruatkima chuan I&PR Officers, Staff leh MJA member zawng zawngte kumthar chibai a buk a ni. Kum 2018 tluang takin a tam zawkin hman a nih laiin, I&PR Department staff mi pali Pu Zomuana, Pu Lalrozuala, Pu Lalruatsanga leh Pu Kissan Thapa te leh MJA Member Pu C.Thanmawia (Kolasib) te’n mual an liam chu pawi a tih thu leh an kalsan an chhungte a tawrhpui tak zet a ni, tiin a sawi. Kum Thar 2019 Pathianin min hruai thlen avangin lawm awm a tih thu sawiin, hun kal tawhah Minister fel leh thahnem ngai takte I&PR Department hian a lo nei tawh a ni, a ti a. Department leh MJA ang te pawhin hma tam tak lak niin, hmalak  chhunzawm tur tam tak a awm a rin thu leh theihtawp chhuaha a nih tur thu a sawi bawk a ni. Minister chuan ram hmasawnna tur te, khawtlang hmasawnna tur ten, sawrkar ina ruahmanna a siam ti puitling turin theihtawp chhuaha tan lak puiah I&PR Department leh MJA member zawng zawngte a sawm a ni. I&PR Department hi sawrkar thu leh hla puangtu niin, sawrkar policy mipui te hnena hrilhhretu a ni, a ti a. Chanchinbu lama thawktute pawh mipui rawngbawltu niin, he kum thar hian midangte malsawmna thlentuah min siam se, a ti a. Mizo Tawng humhalhna kawngah leh  Mizo Tawng Dik zirtir kawngah pawh I&PR Department leh MJA member te chu mawhphurtute an ni, tiin a sawi a ni. Thawhona tha leh inpumkhatna rilru nena thawk turin a ngen bawk a ni. Kum Thar 2019 hi ram tan, khawtlang tan leh chhungkaw tan te’n malsawmna ni se, tiin duhsakna a hlan a ni.

MJA President Pu Zonunsanga pawhin thu sawiin Minister thar leh I&PR Department hotute nena Inhlan Tharna Hun hman anih chu lawmawm, a ti a. Press Tour leh Sawrkar ina Chanchinbu a tam thei ang ber lakna (subscribe) kawngah MJA President chuan I&PR Minister chu hmalakpui turin a sawm a ni. Chanchinbu Editorial in ram kalphungah awmzia zau zawk a neih theihnan Review Meeting Committee siam ni se chuan, sawrkar chak leh kalphung tha zawk neihna kawngah Chanchinbu miten pawimawhna thui tak kan nei ang, tiin a sawi a ni.

I&PR Director Pu David L.Thangliana chuan khawvel changkang zelah media hian pawimawhna tam tak a nei a ni, a ti a. Ram tana thawk turin I&PR Department Officers, Staff leh MJA member zawng zawngte a fuih bawk a ni.

Kum 2018 chhunga I&PR Department a thawk mi pathum leh MJA member pakhat thi te sun nan minute khat ngawi renga ding a ni.

He hunah hian Information & Public Relations Secretariat staff, Directorate staff leh MJA Member tha hnem tak te an tel a ni.