No.7518/2020-2021

Vawiin khan Dr. R. Lalthangliana, Hon'ble Minister, Health & Family Welfare, Higher & Technical Education, Commerce & Industries Department chuan Silsuri khua-a Border Trade Centre hmun tur en thlithlaiin a tlawh.

Minister hian Border Trade Centre chu Mizoram mipuite tana tangkai tak anih tur thu sawiin kan ram mamawh chakkhai lakluh nan leh kan ram tharchhuahte hralh chhuahna atana hmun pawimawh leh tangkai tak a la nih ngei a beisei thu a sawi a. Silsuri khua-a Border Trade Centre emaw Border Haat siam chu Sorkarin a ngaihpawimawh berte zinga mi a ni a, Bangladesh atanga bungrua lak luh chauh ni mai lovin kan ram tharchhuah Sawhthing, Chhawhchhi, Hmunphiah leh thil hrang hrangah insumdawntawnna tura lo intodelh tura chahin SEDP hnuaiah chak taka hmalak anih dawn thu a sawi a. Marked Shed pawh sak thuai tura hmalak anih dawn thu a sawi a ni.

Minister chuan Sorkarin Trade Centre hmun tur leina tur chu tun maiah a la neih mai dawn loh thu sawiin an khawtlang hmasawnna tur anih hrerenga VC ram emaw, mimal ram emaw phal taka pe thei an awm chuan a lawmawm hle ang tiin he trade centre hi hlawhtling taka kalpui anih hunah chuan kan ram economy-in nasa taka a changtlun phah dawn avangin hmanhmawh leh chak taka kalpui turin Sorkarin hma a la mek a. A tul dan ang zelin Bangladesh leh Ministry Govt. of India pawh sawipui zel anih tur thu a sawi bawk a ni.

Silsuri khua leh Bangladesh inkar khawthlang tuipui kamah hian kan thenawm ram Bangladesh nen mumal taka insumdawntawn theihna hmun tur Border Trade Centre kan neih theihna turin Commerce and Industries Department kaltlangin Sorkar-in hma a la mek a. He border trade hi hlawhtling taka kalpui anih chuan helai tlangdung mipuite'n nasa taka an chhawr tangkai tur niin eizawnna kawngah hmasawnna rahbi pawimawh tak a ni dawn a ni.

Insumdawntawnna kalpuina tur atana Mizoram leh Bangladesh inkar Silsuri atanga Chittagong port leh Bangladesh khawpui Dhaka hlat zawng chu hetiang hi a ni.

Silsury - Sajek = 8 km

Sajek -Dighinala = 44 km

Dighinala - Khagrachari = 27km

Khagachari - Rangamati = 72 km

Rangamati - Chittagong = 78 km

Chittagong - Dhaka = 246 km

Dr. R. Lalthangliana hi Silsuri khawtlang mipuite'n Public meeting lo neihpuiin khawtlang mamawh hrang hrangte Minister hnenah hian an lo thlen a. Bangladesh lam Mahmuam leh Chhippui-a kan Mizo unaute'n Minister hi an lo hmu bawk.

Minister Dr. R. Lalthangliana hi Pu Lalrintluanga Sailo, Dy. Govt. Chief Whip/Dampa bialtu MLA, Aizawl atangin Pu C. Ramhluna, Vice Chairman, Commerce & Industries Development Board, Pu P. Jawahar, IAS, Secretary, Commerce & Industries Department, Pu H.D Lalrintluanga, Addl. Director, Commerce & Industries Department, Pu R. Lalrintluanga, Chief Engineer (Road), PWD, Pu Ronald Lalchhuanawma, Asst. Director, Commerce & Industries te'n tawiawmin Mamit atangin Dr. Lalrozama, IAS, DC, Pu Shashank Jaiswal, IPS, SP, CMO leh DIPRO, W. Phaileng atangin BDO, Silsuri a awm mek BSF Asst. Commandant bakah khawtlang hruaitute'n an tawiawm a ni.