Samagra Shiksha, Lawngtlai District hnuaia naupang, pianphunga rualbanloh vanga a bika tanpui ngai (children with special needs - CWSN) te hnenah vawiin khan Lawngtlai DC Conference Hall-ah hmanrua leh tanpuina (aid & appliance) sem a ni a. Lawngtlai Bawrhsap Dr Andrew H. Vanlaldika'n hun a hmanpui.

Bawrhsap Dr Andrew H. Vanlaldika chuan naupang a bika ngaihsak ngaite tana Samagra Shiksha hma lakna chu lawmawm a tih thu sawiin, nu leh pa leh zirtirtute'n naupang a bika ngaihsak ngaite chu an theihna sawr chhuak tura kaihhruai thiam a pawimawh thu a sawi a. Anmahni enkawl chu phurrita la lo va, chonaa ngai zawk tura chahin, an rilruah, "Mi theih ang chu ka thei ve," ti thei tura tumruhna leh paukhauhna tuh tum turin a chah a ni.

Vawiina hun hman hi Samagra Shiksha-a District Project Coordinator, Lawngtlai District Education Officer ni bawk Pi R. Lalnunthari'n a kaihruai a. Inclusive Education incharge Pi Elizabeth VL Chhuangi'n CWSN-te tana an hma lakna report pein, Additional DPC Pu T. Hmangaih Johana'n lawm thu sawina hun a hmang bawk.

Vawiin hian a bika tanpui ngai naupangte tan wheelchair 5 leh zakdo tiang (crutch) 3 bakah, thilpek dang sem a ni a. Bawrhsap leh LADC-a School Education (Primary) changtu Executive Member Pu Sanghuliana Mualchin te'n hmanrua leh tanpuina hi a dawngtute kutah an hlan a ni.

Samagra Shiksha hma lakna hnuaiah hian Lawngtlai District-a block pali-ah rualbanlo naupang leh an mamawh zawn chhuahna (assessment camp) hi kum tin buatsaih thin a ni a. Primary school 226 leh upper primary school 154 tuamin, tun dinhmunah CWSN naupang hi 380 an awm mek a. An harsatna azirin an mamawh wheelchair, zakdo tiang (crutch), tarmit leh bengdar te pek thin niin, CWSN hmeichhe naupangte hnenah kum tin sumfaia tanpuina (stipend) pek thin a ni a. CWSN naupangte zinga sikul kal tura veivahnaa harsatna neite hnenah transport allowance leh anmahni hruaitute tan escort allowance te pek thin a ni bawk.