No.6108/2020-2021

Health & Family Welfare, Commerce & Industries leh Higher & Technical Education Department -te changtu Minister, South Tuipui Assembly Constituency bialtu MLA Dr R. Lalthangliana chuan vawiin khan Hnahthial tlawhin Hnahthial District huamchhunga VC member thlan tharte tana Orientation Programme chu Electric Veng Indoor Stadium Hnahthialah a hmanpui.

'Orientation Programme for Newly Elected Members of Village Councils within Hnahthial District' ah hian VC te zirtirna pek niin VC tin te hi lawmpuina Citation hlan an ni.

Vawiin programme Pu J Miahlung, DLAO Lunglei kaihhruaiah Minister Dr R. Lalthangliana chuan Hnahthial District VC thlan tharte chu duhsakna hlanin an hmalakna hrang hrangah thlei bik leh duhsak bik neilo a rorel thiam turin a chah a. Village Council hruaitute chu sawrkar hmalakna hrang hrangah a bulthuta awm, mipui dinhmun hrechiang ber tu leh mipuite ngheng hnai ber tu an nih avangin ram hmasawnna kawngah leh remna leh muanna humhalh kawnga an pawimawh zia leh an mawhphurhna a san zia hre thar turin a chah bawk. Khawtlang tana chhenfakawm khawp ruhrel tha kan din a pawimawh a ni tiin hemi kawnga theihtawp chhuah tur leh kohhran leh NGO hrang hrangte nen pawh thawhhona tha tak nei tura tan la turin a chah a ni.

Covid-19 hrileng chungchang pawh sawilangin H&FW Minister chuan Covid-19 do kawngah Mizoram chu ram pum huap pawha hma la tha berte zinga mi a ni a, Covid-19 hrileng avanga nunna chan la awmlohna State awmchhun kan ni mek a ni,a ti a. Covid-19 hrileng do kawngah Mizoram mipuite kan tang ho takzet a ni tiin H&FW leh Department hrang hrang thawktute, tlawmngai pawlte, LTF, Kohhran hruaitute leh mipui thahnemngaihna leh thawhrimna avangin an chungah lawmthu a sawi a.

He huna khualzahawm Hnahthial DC Pu Vanlalmawia chuan Hnahthial District huamchhunga VC thlan tharte chu a lawmpui thu sawiin democracy rama hmun pawimawh tak luahtu, khawtlang hmasawnna atana mawhphurna sang tak neitu an ni tih hre thar turin a chah a. Vawiin training program chu hmang tangkaia, zawhna an neihte pawh inthlahrung lova zawt tura chahin kawng hrang hranga an hmalaknaah hmathlir thui tak nei chunga mumal taka plan siam thin tur leh khawtlang tana ro tling hmasawnna ruhrel ruahman leh mipui tam zawk tana eizawnna ngelnghet siam sak chu ngai pawimawh hmasa thin turin a chah a. DC office -ah an mamawhte thlen vat thin turin a sawm bawk a ni.

Vawiin program-ah hian Pu Lalchawimawia,Jt Director,LAD chuan 'Roles and Responsibilities of VC' tih thupui hmangin zirtirna a pe a. Sawrkar laipui Finance Ministry chuan 15th Finance Commission sum 1st installment (Untied Grant -khua ami ten an mamawh atana hman tur) cheng nuai 2325 leh 2nd installment (Tied Grant - sanitation,ODF, tui in tur, rain water harvesting leh water recycling a hman tur) atan cheng nuai 2325 an rawn release tawh a, Sanction proposal kal tir mek a ni tih Pu Lalchawimawia chuan a report. 15th Finance Commission Grant hi sum dang nen hman pawlh loh tur niin District level-ah pawh DLAO ten hemi atan bank account an hawng tawh a. A sum che vel hi PFMS (Public Financial Management System) a thlunzawm tur a ni. Sawrkar laipui Ministry of Panchayati Raj in ruahmanna a siam angin Fifteenth Finance Commission Grant hmanna hi Audit Online hmanga audit tur a ni a. Hnahthial District ah pawh a hmasa ber atan Audit Online kalpui turin VC paruk - Denlung, Hnahthial North I, Hnahthial North II, Hnahthial South I, Hnahthial South II leh Rawpui thlanchhuah an ni.

Pu Lalbiakkila, SP Hnathial chuan dan leh thupek kenkawh leh border venhim chungchanga VC-te mawhphurna leh chetlak dan tur chungchangah zirtirna pein Dr R. Lalsanglura, Nodal Officer on Covid-19 chuan Covid-19 hrileng do kawnga VC te mawhphurna leh chetlak dan zirtirna a pe a. Pu Zodingliana, JE, DLAO office chuan 'Role of VC in Implementation of MSFC' tih thupui hmangin zirtirna a pe bawk.

Minister hi Hnahthial DC Pu Vanlalmawia hovin Hnahthial District Hospital-ah sawrkar official-te, khawtlang hruaitute leh mipuiin anlo hmuak a ni. Hnahthial District Hospital, HBSC Ground leh khaw chhung hmun pawimawh dangte pawh tlawh nghalin hmalak tulte a enfiah a ni