1966/2023-2024

Aizawl the 21st September, 2023 : Dr. R. Lalthangliana, Health & Family Welfare Minister hovin tukin khan World Alzheimer’s Day pualin Memory Walk Chanmari kawn atanga Millenium Centre thleng neih a ni a. Millenium Centre Courtyard-ah inkhawm neih a ni.

Inkhawm hi Pu Vanneihtluanga, President, ARDSI in a kaihruai a. September 2022 - September, 2023 chhunga an member boral ta te sunna hun hman a niin thutiam lakna neih a ni. Dr. R. Lalthangliana chuan ARDSI Mizoram Chapter te chu midangte tan an inpekna ropui a tih thu sawiin Alzheimer leh a anpui natna tuarte a tawrhpui thu leh a enkawltuten hrethiam tak leh hmangaih taka enkawl zel turin a fuih a. Minister chuan rilru leh taksa hrisel tur chuan kan hriselna kan ngaih pawimawh a, ei leh in kan fimkhur bakah taksa insawizawi a tul a ni a ti.

Khawvelin a buaipui Alzheimer natna hi Mizoramah pawh ‘thluaksawng natna’ tiin, natna hriat hlawh tak a lo ni ta a. A tihdamna a awm lo ti mahse a veite enkawl danah, chhungkua, thenawm khawvengte leh khawtlang hriatthiamna, enkawl thiamna leh intawiawm tawnna hi thil tul tak a nih avangin a ngaihventu pawl din a ni a. India ram puma Alzheimer natna leh a anpui natna dangte ngaihventu pawl, Alzheimer and Related Disorders Society of India (ARDSI) Mizoram Chapter chu 21st September, 2015, Alzheimer Day ah din a ni.

ARDSI Mizoram Chapter hian phungbawm sawmin Alzheimer natna sawihona leh natna vei enkawltute zirtirna seminar leh workshop te an buatsaih thin a. Aizawl leh a chhehvel hi zone hrang hrangah thenin MUP te nen Alzheimer’s Disease veite chhinchhiah leh tlawhchhuah hna an thawk a, an thih in an ral bawk a. Social media hmanrua hmangin Mizoram pumah he natna vei chhungkuate inhriattawn leh intawiawmna an buatsaih bawk a ni.

Kumin World Alzheimer’s Day thupui chu ‘Never too Early, Never too Late’ (Hma luat a awm lo, tlai luat a awm lo) tih a ni. Memory Walk hi Alzheimer and related Disorders Society of India (ARDSI) Mizoram Chapter buaisaih a ni.