No.1978/2021-2022

Dated Aizawl, the 24th August, 2021: Vawiin chawhnu hian Dr. R. Lalthangliana, Minister, Health & Family Welfare, Higher & Technical, Commerce & Industries, etc., hovin Serchhip District Level Task Force on Covid19 te chu Serchhip DC Meeting Hall ah an thukhawm.


He hunah hian Minister chuan, Covid19 hripui dona kawngah Serchhip District in hma in lak that avangin vawiin thlengin dinhmun tha takah in ding tih kan hmu a, kan lawm hle a ni, hripui hian engchen nge min chamchilh zel dawn tih kan hriat loh avangin tha thlah lova lo bei chhunzawm zel turin ka sawm che u a ni, a ti a. Test kit te, Covid19 damlo enkawlna hmanruate leh mamawh dang awm thei apiangte sawrkarin a ngaihtuah reng a, heng hmanrua leh bungruaah te hian thlaphanna tur a awm lo a ni, a ti. Dr. R. Lalthangliana chuan, Serchhip leh Lunglei District chu Covid19 dona lama sawrkar sum bak sum hnar dang, Corporate Social Responsibility sum dap chhuah kawngah in thawk tha hle mai a, in chhuanawm hle a ni a ti bawk. Minister chuan NE States dangte nena kan inkhaikhinin Covid19 dona leh invenna lamah kan dinhmun a duhawm thawkhat hle a, hei hi sawrkar leh mipuite thawh hona that vangte, Pathian khawngaihna kan dawn vangte a ni a, theihtawp chhuaha kan tan tlan zel a la tul tih pawh mitinin kan hriat a ngai a ni, a ti bawk. Minister hian, Covid19 thawh thumna lo thleng leh mai tur anga mithiamten an rin avang leh he a thawh thumna hian naupang lam a tuam dawn nia rinna te a awm avangin sawrkar a inbuatsaih chho nasa hle tih tarlangin, Serchhipah pawh naupang puala ICU buatsaih a nih tur thu tarlangin, hmalakna pawh a awm tawh thu a tarlang a, Serchhip Hospital inbuatsaih mekna enpuitu tur team a rawn tirh thuai tur thu a tarlang bawk. Dr. R. Lalthangliana chuan, Covid19 hri kai tawhte zirchianna atangin tha taka hmai tuama, kut sil taima ten an kai tlem bik hle tih hmuhchhuah a ni a, hei hian mitinin mawhphurhna pawimawh tak kan nei tih a tichiang em em a ni. Chuvang chuan mitinten fimkhur thlahthlam lo ila, chhungtinten invenna ngai pawimawh thar reng ila, dinhmun tha zawkah kan inhlang chho zel dawn a ni, a ti bawk. Vaccine lak lama tan lak zel a tul tak meuh tih sawiin Serchhip District ah a la thei tur chin za zela 85 ten first dose an la tawh chu lawmawm a tih thu a sawi a. District titha ber nih tum tura chahin, Vaccine la tawhten Covid19 hi kai thei tho mahse an tawrh a nepin ICU luh palh theihna a hniam bik em em a, a tam thei ang berin kan lak thuai chuan kan ram dinhmun a tha hle dawn a ni, tiin Vaccine lak lama tan la sauh sauh turin a chah a ni. Minister hian Khawlailung PHC, Thenzawl CHC, Chhingchhip PHC, Serchhip District CMO leh District Hospital hnenah thilpek a hlan a ni.


Meeting hi Pu Lalmuansanga Ralte, MCS, DC in a kaihruaia, Pu Stephen Lalrinawma, MPS, SP, Pi C. Laltleipuii, SDO Sadar, Dr. Lalngaihawmi, SMO ten Serchhip District report hrang hrang an pe a, Dr. Pachuau Lalmalsawma, State Nodal Officer & Official Spokesperson on Covid19 pawhin thusawina hun a nei bawk