41/2022-2023
Lunglei 5th April 2022: 18th MVA Inter District Volleyball Championship 2022 chu nizan (4th April 2022) khan Electric veng GSA Hall Hnahthial ah South Tuipui bialtu MLA leh Minister ni bawk Dr.R.Lalthangliana chu Khuallian niin Spike Off hun a hmang a, District bawrhsap Pu R.Lalremsanga chu Khualzahawm niin Superintendent of Police Pu Lalbiakkila pawhin a hmanpui bawk a ni.

Dr.R.Lalthangliana chuan Hnahthial District chu kum 2 leh a chanve vel chauh ala nih thu leh infiamna hmanrua ala awm tha lo chungin State pum huap Volleyball Championship buatsaih a ni chu lawmawm a tih thu sawiin hmanhmawh taka Volleyball Court siamthat a nihna ah Sports Minister, MVA leh HDVA hruaitute inpekna fakawm a tih thu a sawi bawk. Hnahthial District chu Mizo zinga Footballer sawi hlawh ber ber Jeje Lalpekhlua leh S.Malsawmtluanga te bakah Hockey lamah pawh Olympic player zinga lang pha H.Lalruatfeli te chhuahna a nih thu bialtu MLA Dr R. Lalthangliana chuan sawiin Inter District Volleyball Championship pawh hian nakinah chuan Volleyball lama mi hmingtha an la chhuah phah ngei a beisei tih a sawi bawk a ni.

Health Minister Dr.R.Lalthangliana chuan Aizawl khawpui Traffic jam karah college zirlaite Lirthei a kal aiin Ke a kal uar se a duh thu a sawi a, "Ke a kal hi a zahthlak lova kan taksa sawizawi that hi keimahni tan a ni. Kan dam rei leh rei loh hi kan insumna ah te leh kan insawizawinaah te hian a innghat a ni" tiin Infiamna lama Thalai ten harh tharna an chang mek chu ropui a tih thu a sawi a, "Infiamna hian lawmman laka hmingthat ngawt ni lovin thil tha tam tak a keng a ni" tiin thiamna leh hmingthatna te chuan a daihrei a pawimawh thu leh insumtheih loh avanga mual liam an awm thin chu pawi a tih thu a sawi bawk a ni

Khualzahawm District Bawrhsap Pu R.Lalremsanga pawhin Hnahthial District chhung ngeiah Inter District Volleyball Championship 2022 nghah a ni chu lawmawm a tih thu sawiin "Infiamna hian ram leh ram, Hnam leh hnam in unauna a thlen thin a, he Championship-ah pawh hian chak dan leh chak loh dan kan thiam a tul a ni" tiin District hrang hrang atanga kalkhawmte inkarah inthian thatna thlen se a duh thu a sawi bakah Hnahthial District-a thil pawimawh hrang hrang a tarlang bawk a ni.

He hun hi Pu H.Lalrindika leh Nl.HT.Lalzahngaii ten kaihruaiin Rev. V.Lalzarliana, Chairman HKJC chuan Pathian hnenah inhlanna hunserh hmangin Pu F.Laldinthara, President, HDVA chuan District hrang hrang atanga kalkhawmte lawmna thu a sawi a, MVA Gen.Secretary Pu C.Lalrokhuma leh Pu RK.Hminga, Organising Chairman ten thu an sawi bakah Pu Micky R.Lalenkawla, Adviser, HDVA chuan lawmthu sawiin hun a khar a ni

18th MVA inter District Volleyball Championship 2022-ah hian Mizoram a District 11 zingah Siaha District tih loh chu an tel vek a, Mipa team 10 leh Hmeichhe team 9 ten inelna an hmachhawn dawn a, vawiin (5.April 2022) atang hian tunkar Inrinni (9.April 2022) thleng a awh dawn a ni.