Vawiin hian Minister Dr. R. Lalthangliana chuan a bial chhung khua Chawngtui tlawh pahin Khawlailung, Chekawn leh N. Vanlaiphaia te a fang kual nghal a, sawrkar hmalakna hrang hrang te enin khawtlang hruaitute nena inkawm hona hun te a neihpui.

A hmasa berin Minister hian Khawlailung PHC tlawhin thawktute nen inkawmna hun an hmang a. Khawlailung PHC chu kumin chhunga building thar sak hna an tan hman a beisei thusawiin, NABARD atangin hemi atan hian Rs. 140.21 lakh ruahman a ni a, tunah Administrative Approval leh Expenditure Sanction nghah mek a ni, a ti. Mamawh dang an sawi te pawh a tahtawlin ngaihtuah sak zel a inhuam thu a hrilh a ni. Khawlailung PHC meeting room ah Khawlailung Sugarcane Growers Association hruaitute nena inkawmna hun a buatsaih nghal bawk a. Fu chingtute tana hmalakna te, an mamawh hrang hrangte chu SEDP atangin ruahmanna fel tak siam sak an nih tur thu a hrilh a ni.

Hemi zawh hian Chekawnah Chekawn khawtlang hruaitute nena inkawmna buatsaih leh a ni a. Chekawn khawtlang hruaituten School leh Health Sub Centre an mamawhna an lo thlente a ngaihthlak sakin a tul ang zela hmalak a nih tur thu a hrilh a ni.

He mi hnu hian N. Vanlaiphai lam pan lehin Rahsi Venga Forest Rest House tualah amah lo dawngsawngtu sawrkar hnathawkte leh khawtlang hruaitute nen inkawm hona hun buatsaih leh a ni. He hmunah hian Dr. R. Lalthangliana chuan, N. Vanlaiphai kawng chu laihzauhva a thara blacktop tura hmalak mek a nih thu te, Lunglei district nena kan inkalpawhna tur, N. Vanlaiphai leh Chawngtui inkar siam thar a nih tur thute a sawi a. An khawtlangin mamawh hrang hrang an sawi te chu a theih ang ang umzui a nih tur thusawiin, hmalam panin an kal ngei dawn ani tih lo inhre turin a chah a ni. Minister chuan sawrkar thar chu a hmingin thla ruk laia upa ni tawh mah se a taka hna kan thawh theih hun chu thla hnih khat emaw lek a la nih avangin dawhthei taka min lo nghah erawh chu a ngai rih a ni, a ti. Kan sawrkar tharah hriselna lama hma kan sawn theih nan sawrkar hian nasa takin hma a la nghal a, PHC a damdawi supply tam tawklo thin te kha tinep nghal a ni a, thawktu indaihlohna te, quarters indaihlo lutuk te tihnepna tur ruahmanna pawh tunah kalpui mek a ni, a ti. A pawimawh ber erawh chu damlo tihtlema, hrisel tura kan nun vawn uluk hi a ni thung a. Mahni taksa duata, min tihrisel lo thei thil ei leh in tinreng lakah inthiarfihlima, nun vawng uluk turin kan ram mipuite ka ngen a ni, a ti. Health Care Scheme tha zawk nei tura ngaihtuahna sen mek anih thute tarlangin, reiloteah a taka hman theih thuai a beisei thu a tarlang bawk.

Heng bakah hian Minister hian SEDP hmanga hmalakna tur tam tak ruahman anih thusawiin, Department tinten anmahni zawnah theuh tha taka hna an thawh theih nan fund tha tawk tak neih tir vek SEDP hian a tum a. Loneitute leh kuthnathawktute tana hamthatna tam tak bilh tel a ni bawk a. A takin heng hamthatna ruahman te hi kan hmu thuai dawn a ni, tiin a sawi bawk.

He hunah hian Dr. Eric Zomawia, Mission Director, NHM chuan N. Vanlaiphaia ICTC kalpui a nih dan sawifiahna a nei bawk.

Hemi zawh hian Minister hian N. Vanlaiphai damdawiin leh Health Department hmunhma te a tlawh nghal a ni.

N. Vanlaiphaia hun a hman zawh hian Minister hian Chawngtui a pan lehnghal a. Chawngtuiah khawtlang hruaitute nena inkawmin, Sub Center a tlawh nghal a ni.

Minister hi Aizawl atangin Pu. HD Lalrintluanga, Jt. Director (Commerce Wing), C&I, Department, Dr. Eric Zomawia, Mission Director, NHM, H&FWD, Dr. C. Lalzepuii, Jt. Director (Planning), DHS, Dr. Mary Lalrammawii, MO (AYUSH) ten an tawiawm a. Serchhip atangin Pi Lalthlamuani, EE, PWD te, Dr. Laldawngliana Sailo, CMO, Serchhip, Pu K. Saitluanga, DIPRO Serchhip ten an tawiawm bawk a ni.