FCS&CA Minister Pu K Lalrinliana chuan kolasib District Hospital sak that dan ruahmanna awm mek chu a hmunah kalin a zirchiang.

Minister chuan mipuiten harsatna an tawhloh nan tuna Hospital building ding lai chu thiat loin a sir lamah building thar chu sak mai nise tha nia a hriat thu a sawi a, a zauh zawng bakah kawng remchang zawk te a awm em tih zirchiang turin District Bawrhsap, CMO, DMS bakah PWD building Division ten lo zirchiang se tha a tih thu a tarlang bawk. Khum 100 awm tura ruahman Kolasib District Hospital Building sak nan hian 15th Finance Commission ah Vbc 41.496 vel hu rawtna thehluh a ni a, a sakna tur sum hi nakum lamah a chhuahfel hman beisei a ni.

Pu K Lalrinliana chuan Kolasib District Hospital chu Aizawl leh Lunglei tiloh ah chuan workload ngah ber an ni thu Statistics in a tarlang ani tiin ngaih pawimawh an ngai ani a ti a, Dental Surgeon, Nurse leh Group D Staff indaihlohna ah pawh hmalak chhoh zel tur anih thu a tarlang a, District Hospital hman tur Ambulance chu Indian Oil Corporation CSR atanga a dil thu sawiin District Bawrhsap in Ambulance mamawhna thu chu lehkha hmangin a ziahlan a ngai ani a ti a, lehkha chu thehluh thuai ni se chak zawka a bawhzui tur thu a sawi bawk, Minister chuan Kolasib District Hospital a thawk Doctor te bakah Nurse te chu fakawm leh rintlak a tih thu a tarlang a, theihtawp chhuah chhunzawma mipuite tan Rawngbawl zel turin a chah bawk a ni.

Minister hi Kolasib Bawrhsap Pu Zoengsanga, CMO Dr.Hmingthanmawii, DMS Dr.Robert Lalfakzuala leh Medical Officers ten an tawiawm a ni.